هات القلم واكتب من الفكر مافاض =يشبه جرادٍ من على الريع فاضي
عجل علي واعتجل قبل الانقاض =من قبل ماياتي من الفكر قاضي
لا هزني شوقٍ ولاني بمغتاض =الا اني افرض كلمتي به وقاضي
غرفت صاف الجم وابقيت الاخواض =حتى شرب عطشانها من حياضي
وانباج عن وجهي غشى غش الاعراض =واهتز خفاق الحشى بنتفاضي
شفت الطرب نسج الغضب عقب ماراض =مما يهز النفس للنفس راضي
نفسي معودها تعودت مقراض =مقراض للي ماعرف من يقاضي
ولاني معودها على شذب الاعراض =ولاني على النمه شفوقٍ وفاضي
البارحه و اليوم للسد حفاض =وباكر نعزز صبرنا باقتراضي
اصبر على العالم كما صبر مغتاض =ان شفت غبران الوجيه البغاضي
اصبر كما صبر البليهي ليا ناض =سفينة البيدا متونه عراضي
لو ان بعض الصبر للرجل كضاض =ليا صار ماتقضي ولامن مقاضي
اصبر على بلواي وشواي نجاض =لو لاح قلبي من لضى النار لاضي
ماكني الا من فقد بأوله ماض =وحدوه عن عرشه كبار القواضي
انا شبيه اللي فقد نجم الاوماض =سهيل اليماني للبصير المغاضي
عليه ناحوا غير الاسلام الارفاض =وعصاة اليهود حدادهم بالاراضي
رثاه خالد فيصل ودمعنا فاض =زعيم لامه ماحدن به يعاضي
وانا بحالي مثل مدين الافراض =يبون نجواهم عليها حفاضي
ان ساعدت دنياي بيماني اعتاض =وان عاضبت دنياي ماني براضي
ياكود ماياتي له الروح قباض =ويحكمبه اللي للتدابير قاضي
مارتاح انا مادام بي عرق نباض =موتي بعز ولاحياة النقاضي