ياقلب خذ مني كلامي لياجاك=عساك تلقابه هداك ودليلك
وياقلب لاتشكي من ظروف دنياك=ترى المقدّر لازم انه يجيلك
وانكان بك هـمٍ عن النوم قزاك=لا تشتكيلي هـم ولا اشتكيلك
راجع حسناتك وراجع خطاياك=وحقق ودقق بين عدلك وميلك
وكان الزمن ياقلب اتعبك واشقاك=وانهد من كثر التفاكير حيلك
اعنز على سجادتك في مصلاك=خصٍ ليامن فات ثلثين ليلك
وانظر الى بواب السماء وارفع دعاك=وقل يالله اني طالبك والتجيلك
واعلم ترى لك خالقٍ مايتناساك=هومزبنك هومسندك هوكفيلك
ادعه وقل يارب عبدك برجواك=وبحماك عن شر الزمان ودخيلك
ويارب ياللي مالنا ربٍ حذاك=عبدك قليل الحيل من غير حيلك
جـاك وسجدلك تالي الليل ناجاك=وانت الامل يوم ان عبدك يجيلك
ومـازال يلهـج بالـدعاء ويترجاك=ويبقى على طول الزمن يرتجيلك
وكله امل في رحمتك وبعطاياك=وسترك وتوفيقك وطيّب جميلك
نصيحةٍ ياقلب فيها نصحناك=من ناصحٍ شفقٍ عليك ويبيلك