‏جلست مع ذاتي ادير التفاكير=وأقارن أحوال مع أحوال غيري
‏وأقول ليتي واحدٍ من الهوامير=وأملك مع التجار اسمٍ كبيري
‏ومليار بحساب على اقل تقدير=‏بالبورصه يديرهن الي وزيري
‏وسجل توريدٍ و سجل تصدير=بواخر وسط البحر تستديري
‏وذودٍ مجاهيمٍ وذودٍ مغاتير=يبرا لهن تريلات مي وشعيري
‏وعندي لياجوني ضيوف ومساير=غرف صوالينٍ وبيتٍ كبيري
والناس حولي صايرنٍ دواوير=كلن يبي يضرب نياقه بعيري
‏واصير كني عنتر اوسالم الزير=لو كان ماداني سماع الصفيري
‏ويقال لي يأمير وأنا ما نا امير‏=لا ني أمير ولاني ولد أميري
‏هـذا وأنـا لي عـودةٍ يـالمناعـير=لمقارنة حالي مع أحوال غيري
‏لياشفتلي ناسٍ فأنا حالي بخير=ياكبر فضل الله وياكثر خيري
الله مصورني على خير تصوير=بجسم سليم وفيه عقلٍ منيري
‏ورجلين تحملني مع الناس واسير=وأشوف بعيوني سليمٍ بصيري
‏وانطق من لساني جميل التعابير=واسمع بأذاني كل ما قال غيري
‏هذي نِعم من عند والي المقادير =واللي خلقني بي لطيفا خبيري
‏والمجد ما يأتي بكثر الدنانير =الموت ينال الغني والفقيري
‏‏ويالله ياللي في يديك التدابير=تجيرني من شر حر السعيري
انا و أيا اهل الوجهيه المسافير=كل من رجاء ربه وبه يستجيري
وصلاة ربي عد نبت النواوير=على نبـيٍ بسنته نستنيري