لو كل خلق الـلـه عطوا حق الجـوار=ماناف فـي نامـوسـهـا شيخ الظفـير
ولو قـيـمــة الـخــوه تسـدد باقـتـدار=مانافوا الـشـلـقــان في شيل الكسير
لو من بـغــى الجـنـه يسـافـر قندهار=ماكـان حــج الـبـيــت بالـذكـر المنير
ولو من يقول القاف يصبح مستشار=تلقى الـذي مـثـلــي مـع الـعـالـم كثير
ومااقـول عـنــدي للـتـمـاثيل احـتكار=بـس الـشـغـايـا ماتـقــارن بالـمـحـيـر
والـبـنــز تـفــرق بالـمـكايـن عن نمـار=وتنسى الـثـمـيـله دام بالـمربــاع بـيـر
لادار دولاب الـــقـوافــي واســتــدار=جـتـــنـي تشـادي للـنعام الـمسـتذيـر
والا طـيـــورٍ ذيــره فــرخ الـحــرار=والا الجـراد اليا غشى روضٍ نضـير
ماجـبـتـهــا تـوريــد في شحن الـمطـار=او بـاخــرات الـنـفــط بالموج الغـزير
مـيـراث عــودٍ خالــطٍ شـعــره وقــار=خـلا الـقـوافــي بالـفـعــايـل تسـتـنـيــر
ورثٍ كـفــاني كـنـز مذحـج مـع نزار=دامـه عـدلـنــي بالـفـرزدق مع جـريـر
نـوبٍ عـلــى نـهــج الضـيـاغم مـع عرار=وقاف الخـلاوي بالعرب وابـن الوزير
اقـوى من الـبـنــدق الـيـا ثـار العـيـار=او سيف هـنـدٍ طالع من جـمــر كير
في خــافــقٍ مـن شـعــر غـيـره مايـغـار=غـيـرة هـنـوفٍ هـمـهـا كسب الـعـشيـر
لاشفت راع الطـيـب بالـنـاموس سار=خـلـيـت روحــي مـع طـواريـقــه تـغــيـر
وان جـبــت لولو من صواديف المحــار=غــديــت مـثــلــه للـنــدى كـنـي سـفـــير
والا كتبت اسمي على الدرب انتـظـار=ولا عـيـب في حـظٍ مـنـع طـيره يـطـير
وماراح اراجي بالـعــرب كسب افتخار=لاصـرت كل الـوقـت باطراف السريـر
والحـســد دربــه بـيـن كــل الخـلق عــار=كــم واحــدٍ حــده عـلــى ظـلــم الضمير
ان ما عرف عـيـبٍ علـى المحسـود جـار=وظلم الـبـشـر ياطاك لـو دونك خـفـيـر
والــرزق مادونــه سـجـون ولا حصار=ان كان مكـتــوبٍ عـلــى لوح الــقـديـر
اللـي رزق دابٍ كـفــيــفٍ فــوق غـــار=لو ماشكى غيره على الــوضــع الـمـريـر
وباب الامـير ان حال من دونه ستار=رح للالـه الـلــي كـتــب رزق الامـيــر
والادمــي لـو كـان فــي طـيـبــه مـزار=ما كــل بــرقٍ لاح بـمــزونـــه مـطــيــر
وكـم تـاجـــرٍ مـركــاه بالـشــده هــيـــار=لو طحت ما قدم ولـو قـوطـي عصير
ومــيــراد دنـيـــانـا على نـفـس الـمـسـار=والـفــرق بين الناس بدروب الـصـدير
ومـن بـان لحـمــول الـثـقـــايل ثـــم بـــار=مثل الذي يـرغـي عقب حـس الهـدير
والـبـذل وقـت الـضـيـق للطـيـب شعار=اللي يشيـل الـثــقــل بالــوقـت العـسـير
وشــدايــد الـدنـيــا على الطيب اخـتبار=حتى تعزل القـمح عن حوض الـشعـيـر
اخــاف سـيــفٍ بالــرخــى حــرر ديــار=واليا بـغــيــتـــه بالـقــسـى تـلـقــى الجــفــير
ومحـدٍ بـمــيـــدان الـنـــدى يـصــبــح مـنار=لا طــاوع الخــفــرات بالـوقــت الخـطــيـر
ومن عـاش عـمـره ســايــرٍ دون اخـتيار=لاتطـلــبـــه شــوره تــره مـثـــل الـغـــريــر
وظـل الـفـريضـه شـر مـن شمس الخـيار=وفـقــرك ولا عـيـش الردى وسط الحـرير
وان عـشــت مالك بالـعرب اي اعـتـبـار=تصـبـح كـمـا الـثـيًــل عـلـى جال الـغـديـر
ولايـنــدم الـلــي جــاب ربــعـه واسـتـشـار=وان زل مـا خـــاف المــــلامـــه والمــــعــــيــــر
وشـيـخ العرب يرسـي الـيـا ضــاق المسار=وان نــار كـــل الــربـــع مــع دربـــه تــنـــيـــر
والخـتـــم مايـعــطــي عـلــى الـشيـخه قـرار=ولا راح تدخـــل فــي تـقــاريـــر الــوزيــر
والشيــخ من يـسـعــى لـنـصـرتـهــا جـهــار=ويرفى الضعيف ويـنـفــع الشـيــخ الضرير
طـيـبه يـجــيــر الـلــي من الضيم استجـار=ويـمـنــع شــرور وفـيــه لاهــل الخــير خـير
والـلـي يـبــي نسـلـه عـمــارٍ فــي عـمــــار=يـتــرك بـنــات الـعـفـن لـو زيـنـه شـهــيـر
زرع العرب يطـلـع على طـيـــب الـبـذار=والا تـصـيـــر بـمـقــعـــد الــذلــه جــــديـر
صـعــبٍ تـبـــدل بـالـولــد قـطـــعــة غـيـــار=دام الــردى بـعـروق طـفــلك يـسـتــديـر
ومن طارد الـمقـفي مـشـى قـفـو الـقـطار=مـثــل الـــذي يــارد وخــلــق الله صــدير
والـلــي يـبــي بـيــــع الــذبــايـــح مايـحــار=عـجــلٍ يـريــد الـبــيــع مـن قـبــل المســير
يـاصــل سـلايــل يــام مـفـنــيــن الـفــقــار=نـقــوة بـنـــي مــره شـفــى كـبــد الـفـقــيـر
وان جـاء بـيــوت الـلـي مضايفهم كبار=تسـمــع سـكـاكـيــن الـمــراجـل له صرير
والـلــه فــلا يـكـبــر مـع الـراعـي حــوار=وحـولـه مـن الـمـره ولــو طـفـلٍ صـغـير
شف حربة الـنـابـت على الحاشي دمار=قــومٍ يـحـطــون الـغــنــم فــوق الـبـعــيــر
مايـذبـحــون مـن الـحـــلال الا الخـــيــار=لـيـن امـست الذيـدان مـنهم تـسـتجـيـر
لــو قـيــل للـنــابــت مـع الــذيــدان ثــار=قـلــت ان راع الـثـــار نــوبٍ يستخــيـر
لـو بالـعـرب بـطـــبــــوعــهـــم نـاسٍ كـثار=ما شـفــت فـيـنــا طـايــحٍ مـالـه نـصـــيـر
ان جـاء يـمـيـن الطـيــب ماقالوا يسـار=نـبــع الـفــزايــع لا ظــهـر حــس الـنــذيـر
وسلام ياشـيــخٍ عـطــى قـحــص المـهـار=يامـنــوة الـلــي ضــاق ياعـتـــق الاسـير
لابـانــت الـقــمــراء غــدى لـيـــلـي نـهـار=واللـيـلـة الـقـمـراء هنى قـلـب السـهـيــر
ماالــوم شـيــخٍ قــال عـن طـيـبــك قـمار=مـن كـثـر مـاتـنـثــر من الـمـال الـكـثـيـر
يــارافــــعٍ روس الـنـــوابــت بــاقــــتـــــدار=ومن طاب ساسه صار بالفـزعـه خـبـيـر
نســل الـذي شـاف الـهـنادي والـقـصـار=وشال الاذان الفـجـر بالـصوت الـشـهـير
الـصــوت هــادي والـعــداء تـقــدح شرار=والـقــوم من صــوتــه غــدو شـر وشـرير
لـيــلـة هـــديــة حــط خـــتـــم الانـتـــصـار=فــي سـاعــةٍ راع الــردى قـــلـــبــه يـطـــير
صالح وطـى خــوف الحــرايـب باخـتـيار=ولا اخـبــر لــه فــي موقـفــه هـذا خشير
وياشيـــخ خـــذ زبـــدة كلامي باخـتــصار=وعـمـدا تـركـت الدسم بالبيت الاخــــيـر
جــدك سـمـيـــك والـنـــدى ما يسـتــعــار=وصيت المراجل تـاصل الرجـل الجـديـر
ومـادام جـــــدك ســــار دربٍ مـايـســار=عـنـدك يـصــيــر الـلــي لـغـيرك ما يصـير