ياالله يياللي يسألك كل محتـــاج =ياواصل المقطوع والوصل مقطوع
عفوّك ولطفك بالقضى وقت الإحراج = إجعل لنا حظ ٍ عظيمٍ ومرفــوع
وخلافها خطيت مــزج ٍ من الزاج = والصح أقوله والخطاء ذاك مرجوع
هاض القريح وهاج مثل البحر هاج = عوم ٍ يعوم بعـاتي الريح مدفـوع
هاض الغرام وصار للرجل منهـاج= وأول بداياته بعـبرات وإدموع
ودخلت مع لي باب مـامنه مخراج = وغديت مثل اللي القلم عنه مرفوع
البارحه ياليل مسـراء ومـعـراج = ماغمضت عيني ونومي على الكوع
ولالاج بعيوني حلاء النوم مـالاج = ليت السهرلو طال مكسب ومنفوع
ياويل من مثلي شكى حب وخلاج = والوقت طال ولا جنى منه مزروع
وياراكب اللي مع هل الصنف له تاج=تاج ٍ يتوّج باالولايات مصـنوع
صنف ٍ تميز حي منشاء ومدراج = راعيه مايهديه والبيع ممنــوع
يسبق هبوب الريح وإعجال الأمواج= ويدوّي مثل سيل ٍتحدر على فروع
وإن إعترض ويلات خط ٍ وبطناج= ماهزّن الجبرين ومثومن الكوع
عاج الطيور الطايره عاج مايعاج = إسهام ذيب ٍ والغنم غـر وإرتوع
عجل الندب وقت السفرعجل الإدلاج = يجري مع البيداءعلى صوب وقطوع
راعيه يسري ليل والصبح ما أنباج= يلمع قـزازه باالقمر برق لاموع
منا مشاء عجل ٍعلى عجل الإسراج = ماينهزع ممشـاه لأزوال ونجوع
يلفي على بيت ٍ ماهو بيت مسهاج= ساس ٍ على ساسٍ محصن وموضوع
بيت الزكاء وأوفاء الوفاء عز وأبهاج = من شجرة ٍ خضراء لها فّي وفروع
ماحط باالبـيـبـان قفل ٍومزلاج = مدهل جحافل من هل الكاروجموع
يدعيك بيته عـاصف العود فوّاج= ونجر ٍصداءصوته على البعد مسموع
وإقلط على عذابن زهى وسوطهن تاج= ومزعفرن ٍ توّه على الجمر مصنوع
عقب المهيّـل والقـراء عند هداج = عطه جوابٍ داخل الظرف مشموع
منا سلام ٍ عـد ماطاف حـجاج = يابو طناء حبل الرجاء اليوم مقطوع
إلا إن عـاد إمعيد لأرضه بدعاج = محيي رميم ٍ هامـد الراس وجذوع
يابو طناء حبل الهوى حبك وإدماج = قفل ٍ على الأعنـاق مثني ومربوع
غروّن ملك ماكنها نطفـة أزواج= أنشـهد إنه لاعني باالهوى لوع
خده كما الأنيون من فوق الأبراج = وشقر الذوايب فوق ردفه يجن بوع
وعيونه الموت الحمر عنده أفواج= وشـفـاه ورد الشام مامثلها نوع
صف(ن) ثـمانه حب رمان وثلاج= والكف ديـبـاج ٍ وماهود مجموع
ونهودها بـيـضات وز(ن) بملواج= هافي حشاء ظامر تقل طاويه جوع
والساق غض ولونه أبيض من العاج = هذي وصايف كامل الخلق وطبوع
وجدي عليها وجد غرقان الأمواج = يبي الحيـات و لاتهياء له إطلوع
أو وجد عطشان الفيافي والأزراج= وجدي كماوجده على برد قرطوع
وأربع سـنوات ٍ وأنا بهم وإزعاج= لا وآصلنٍ واصل ولاني بمقطوع
مابين يـأس ٍ والرجاء وآل الأفراج= جزل الوهايب والرجاءمنه مشروع
يابو طناء راع الهوى مـاله علاج = تر ساعتي يوم ٍويومي غداء إسبوع
تمت وصلى الله عدد نشر وإخراج= على رسول ٍ سـاد الإسلام متبوع

يا الله يامدير الكواكب والأبراج= تعطي ولا جزل العطاء منك ممنوع
عالم خفيات الحنـاياء والأدراج=لولا وصالك ماوصل خير وإفزوع
رجواك يارب الفرج منك الإفراج = يالمعتلي لا تجعل الخير مـنزوع
عليك ستر اللي بداء فيه لجـلاج= ياملتجـاء صوت ٍيناديك بخشوع
ومن بعد ذكر الله كما البدر وهاج = قلب ٍ يحـده للتمـاثيل موضوع
قال التبيـناوي بداء بدع وإنتـاج = في قدرة الله يارسـنها معي طوع
يأخذني الهوجاس لإعداد وإخـراج = إهتضت واللي هيضن صافي النوع
ياراكب اللي ياشلع قلت مـيراج= جديد عام ألفين وإثنين مـصنوع
عليه من حدّه على طلعت الفـاج= من قبلي الخطه مشاء جدي وقطوع
لوكان في دربه براخيص وهـبـاج = ينحـاه ناحي صاحي الفكرقاطوع
ذيب الغداري للبعيـدات بوّاج= الفاكس آر وسـايقه قبل مليوع
يضحك حجاجه ياأنعمس كل هلباج = عليه من صدام توصيف وطبوع
فرخ النداوي لأبرق الريش رعـاج = طلعه بعيد ولأبرق الريش نازوع
مع كل فج وحقنتن شاف مـنفـاج= وحيفته من سمعها صد مفجوع
خطط براسه نبك أبوقصر وأنـبـاج = جنب طريق الربع رفحاء وميقوع
يشداء لذيب ٍصادفه راعي إنـعـاج= ليل الشتاءقبل العشاء فـز برجوع
مثل السهم يلعج سناء نوره إلعـاج = وقت الغضب باأربع قوايمه مدفوع
ماطبه الخامس وإذا الخط مـنـعاج= عطاه ثالث خوف بطناج وهزوع
غيّر طريق أهل الدداسن والأدواج= حدد بماجـلان نزلات وطلوع
ولا حـافه الهندي ولابات بكراج = ولاشيف كبوته بمسراه مرفوع
ولا هزّه الرايح ولاإهـتـز بسيـاج = يدلي كما النادر بتوعن وطالوع
شاف الحباري شوحت ٍتدرج إدراج=وأدلاء بها مثل السهم لاحقه جوع
ونوبن تهنفل طامحنٍ شافت إفراج= عنده خبر متحّريه شيخ وفزوع
يلفي على بيت(ن) ماهو بيت مدهاج= بيت الشرف مدهل مشاكيل وإربوع
أخوان ميثاء يالفى النـزل الإرهاج = وتناخوا الفريس والجمع متبوع
كم غـارتن يشبع به الطير ياراج = واللي عتق كنّـه على الوجه ملفوع
بمصقلات الهند تلعج له إلـعاج = كم فارس ٍ باإيمانهم طاح مصروع
يلفي لبو مسند عوض كل محـتـاج = بيته ليا جيته لك القدر مرفوع
المجلس اللي يرفع الراس وحجاج = بأطراف بيته تالي الهيل مجدوع
قول ٍ على فعل ٍ ماهو حكي هراج = ماقّل دّل وصادق الهرج مسموع
لابأس ياقرم(ن) شكاء بعض الإزعاج= يشكي غرام معّزل الوسط مربوع
غروّن حسب وصفه مع الخلق ماداج =غروّن سحر هاروت بشفاه مجموع
ماعرضّت زوله على كل حـوّاج = خمرن كلامه يشلع القلب شـالوع
والعود غصن الموز يامـال وإنعاج =حلون نمـّاه بشاطئ النيل مزروع
زينه طبيعي مـاتـزين بمكـيـاج = يبقى غرامه داخل القلب مطبوع
قلي مكانه لو مكانه باالأفـلاج = ماإرتاح دامك تشرب المر منقوع
حقك علي إلا مـنّـه تأخذ الباج = وأبشر بعز وراعي الحسد ملقوع
لولا رجاء الغفران وش مطلب الحاج= والناس له قانون والسلم مشروع
هذا وعد ومعيد لأرضه بـثـجاج= رب العباد إمـعيد للقاع برجوع
منـزل تبارك والتكاثر والأبراج = على الرسول المصطفى خير متبوع