أشغلني الشاغل اللي لخبط أشواقي= مشغول بأشغال وأنا حاضيٍ حاضي
وضايقني الضايق اللي ضيّق أخلاقي= من ضيقته ضايقٍ والهم بي هاضي
سقت اقدم سوقت اللي سيق وانساقي= بظروف الأيام وظروفه ما هو راضي
يشكي ضغوط الدهر وشقى به الشاقي=ويسهر سهيرٍ سهر ماغط بغماضي
يسامر السامر اللي سامره ساقي= ينوض من نايضٍ نواضها ناضي
يسري ويجري وسهير الجفن ما راقي= بالقلب همٍ وغم ومشغله فاضي
وأنا بعد مثلها بالجوف دقاقي= من خافقٍ بالضماير تقل نفاضي
طواريٍ تطرق المعلوق طوراقي= وحرارة الشمس حره ييبس الحاضي
يالله أنا طالبك لا تخيب أوفاقي = يامصفي الصافي اللي فاض بفياضي
أنت الرجاء والأمل والأوّل الباقي= والناس بالناس سلمه قرض وإقراضي
وأنت الذي قرضتك بحساس وذواقي= وبدار القضاء قاضيٍ تقضي على القاضي
تشفي مريض علاجه ما أعتقد لاقي =وشفاه بأيديك ياشفاّي الأمراضي
يكبر مع الوقت والأيام مراقي= مستعصي والمرض في دمها خاضي
وعن العار والنار تجعل لنا واقي= بظلال عرشك تظلن بعجز مركاضي
لا تحرق الروح والأجسام بحراقي= يامسقي الساقي اللي ساقيه فاضي
في ظل عرشك تظل الجسم برفاقي= بيومٍ جضيض البشر من جضته جاضي
جضيض كدري صفقها ملح تفّاقي= والروح به حشرجه وضيقٍ ونضناضي
جض البشر والحرس من حوله أرواقي= حفاةٍ عراةٍ وعظم الوجه به لاضي
أحدٍ سلك مسلكٍ من يسلكه راقي= وأحدٍ عليه الخطر من فعله الماضي
وأحدٍ من الهول مذهولٍ ولا فاقي= من هول ما شاف يذهل ستر الأعراضي
يفر منه الولد والزوج ورفاقي= كلٍ لحاله يقضى وأنت له قاضي