ياحفلنا طاب الفرح والأسارير= بحظوركم الله يطيب مساك
وقبل البداية ودي اقول تذكير= صلوا على اللي للهداية هداكم
ثم ابتدي ومبداي حمداً وتكبير= بسم الذي لو ماترونه يراكم
واطلب من اللي في يديه التدابير= انه يوفقني لغاية رضاكم
وانه يجملني بزين التعابير= ويجعل رقيب الذات للذات حاكم
حيث الكلام اللي بصدري طوابير= واخاف شيٍ فوق شي يتراكم
وياحفلنا ياحضورنا يالجماهير= هذا المعزب واقفٍ مايخفاكم
قناص شرفني عسى فاله الخير= وكلفني احيي بكم في لقاكم
ومني عليكم يالوجيه المسافير= تحيـةٍ , تليـق فـي مسـتواكم
وسلامٍ اطيب من عبير النواوير= به طاب ملفاكم وكرمة لحاكم
ويامرحبا ويامسهلا يالمناعير= يقوله اللي لاحتفاله دعاكم
قناص داعيكم معزة وتقدير= وتشريفكم حفله يزود غلاكم
يهلي بكم ويكرر القول تكرير= ويقول جيتكم دليل لوفاكم
جيران وإلا. ضيوف وإلا. مسايير= هلابكم انتم و منهو معاكم
وخلاف هذا باقياً قول تعبير= تعبير مني ياهل الحفل جاكم
واقول يالقناص كبير و صغير= الله يديم افراحكم في نماكم
ويحفطكم الله من جميع المعاثير= وعلى مسير الخير يقدا خطاكم
وافين كافينٍ ولافيه تقصير= وماهي غريبة عارفينٍ وفاكم
ياخلفة اللي مايهاب المخاسير= اللي على نهج المراجل غذاكم
فنغيش بن قناص يوم المعاسير= ذكره وكامل سيرته ما يخفاكم
ومبروك ياعادل عسى فالك الخير= والله يجمع بينكم ويحماكم
ويحفظكم الله من صدوف المقادير= ويجعل لكم حظٍ على مبتغاكم
وصلو على المختار ما غرد الطير= وعد النجوم اللي تلوح بسماكم