مرحوم يا شيخنا والأمر رباني=الموت حق خذا حتى نبي الله
الله يجبر عزا مسفر والأخواني= وعمامه الأوفياء والعايلة كله
وكل المفضل من القاصي ليا الداني= ويجبر عزا شمر ٍ في فقد عبدالله
عبدالله اللي له النوماس عنواني=عز الصديق وعلى كبد العدو عله
إن جيت له بالثقافة رجل فهماني=من جالسه بالحديث العذب ما مله
وليا اختلط بالسما عج ودخاني=النفس ما عوده للهون والذله
أماالكرم عنه تقصر هرجة الشاني=ذباح جل الغنم ومقدم الدله
ملجأ وعون الضعيف ومزبن الجاني=من صار له مشكلة يتعب على حله
ويتبع رضى واحد ما عاد له ثاني=وماله بغير الرسول ومنهجه مله
وابوه قبله تبين والوفاء باني=الله يكتب له الحسنات ويحله
من شجرة ٍ ضافية له ساق واغصاني=في لاهب القيظ من جاها دخل ظله
وصادق مع الناس والدولة ومتفاني=من خيرة ابناء الوطن والنصح طبعله
هذا ابن جبرين للزلات ما يداني=عدلٍ يحب الوفاء ما يقبل الزله
لولان صم الحجر للشين ما لاني=وبالعطف مالين منه وارحم منه لله
سور الجبل مرهب الأعداء كحيلاني=ياقل منهو مثل شرواه يا قله
ما أقول خليت ولكن فوق الأمتاني=شيال عظمى الحمول ليا توازله
سنعوسي لو يشين الوقت ما شاني= لا راد ياصل لشي كود ياصله
أما العوض في غيابه خطل الايماني=مسفر ومن كان بالشده عضيدله
حرص ٍ على كلمتي ما ينطق لساني=إلا بشي وأنا بالحيل فطنله
متعهم الله بالصحة بالابداني=وأعانهم بالأمور بدقه وجله
والميت له من عظيم الملك غفراني=والحي رب الملا بالعمر يمهله
أنهيت قيلي بقيفانه والأوزاني=وعلى النبي الصلاة أفضل ختام له