أنا ما عاد اشوف من الدروب الا طريق عتاب=على درب العتب جيتك باعاتبك وتعاتبني
الا ما احلا العتب ما احلا العتب لاصار بين احباب=ويا محلا القصايد يوم اجاوبك وتجاوبني
تعال نشيلها هجيني ونسمر والقمر ما غاب=تعال اسمع باسولف لك عن اللي منك تاعبني
ابا اتكلم واصرح لك وبابدي جملة الاسباب=سوالف حيل عفويه ولا انت ابدن بغاصبني
علامك كلها ايامك جفا وصد وهجر وغياب=وليش نقضي الايام احاسبك وتحاسبني
انا بسبة غيابك مدمعي يجري وقلبي شاب=عسى منته بعد من صفحة الاحباب شاطبني
تعبت اسأل عن اسبابك ولا عندي سوا استغراب=غريبة كيف تتعبني يا ليت انك تجاوبني
وانا والله فلا استاهل تعاملني كما الاغراب=لأنك تملك احساسي وحتى العقل سالبني
أنا حاولت من دون الزعل قفلة جميع ابواب=ولكني فشلت ويظهر التوفيق جانبني
ومن شان الغلا جيتك وفي قلبي قليل عتاب=تعال اجلس هنا يمي باعاتبك وتعاتبني