بقلمي / مشاري عايد الشمري
ياطيـر ياللي بالسما لـك جنحـان =ابيـك انـا يـاطيــر توصـل لخلّــي
تزبن علــى ديرة هـل العـز عمّـان =لـي صاحبـن بديارهـم مستظّلـي
تلفي على مشعان غانم المشعان =الصاحب اللي بالحشا له محلّي
ياصاحبي دارت مداوير الازمان =وحكـم الزمـن لا جـار وا عـزتّلـي
ضعنا وصرنا بين مطرقه وسندان =والكــل ينهـش مــن لحمنـا بغّلـي
من عقب مـا كنا قيـاده ولنا شـان =اليــوم اصبح حـالنــا مستــذلّــي
باوطاننا عشنـا غريبيـن الاوطـان =وصـار الغـريب لدارنـا مستحلّـي
غزوة فكر من منبع افكار شيطان =واستـوطنت فـي واقـعٍ لـه تحـلّــي
بافكارهم يغزون في ذل الاديـان =لــكـــن والله ديننــا مــــا يــذلّــي
ياصاحبي مهما رست فينا الاحزان =شـوفـت بعضنــا للمواجــع تسلــي
عسـى تعـود ايامنـا مثل مـا كــان =وكلـن علـى شـوفــة رفيقـه يهـلّــي
بقلمي / مشاري عايد الشمري