سلام الله على الحاضر سلامه=سلام المخلص الوافي مقامه
قدحت البارح ابياتٍ جزيله=على السرعه قدح برق الغمامه
تكافخ شعري للعلياء تكافخ=كفخ صقر الحباري للحمامه
دعاني ظاهر اللي قد عزمني=وانا حقٍ حضوري لإحترامه
صفاة اهل اللواء بقعاء دياري=امثل ديرتي دار الشهامه
عتيبه لابتي وافخر بإني=امام اللي بهم روح الزعامه
تحت راية ملِكنا قد ملكنا=شموخ المجد وآمنٍ في منامه
الا ياشمّر المعنى تجمّر=من اسباب الفحول اللي امامه
الا ياهل الكرم ياهل الشجاعه=الا ياهل الوفاء ياهل الكرامه
طنايا لاطنو سقم المعادي=صناديد الوغى صبح الجهامه
طنايا لانخاهم من نخاهم=خذو حقه ولا يمرح ضيامه
طنايا طيبهم يشعل فتيله=على سطح الجدي مرسى وسامه
الا ياهل الجبل شفت (الرعيله)=بها منكم علامه في علامه
علامتها بإن شمّر ماتفنى=فعايلهم الا يوم القيامه
الا ياهل الجبل اقسم بإنه=يمووت المدح مايوفي كلامه