اي والله اني فاقـدٍ راحـة البـال=ماغير امـوّل للمواجـع قصيـده
مليت انا طرق القصايد والاحـوال=تخنقني واكتب للمشاعـر جديـده
ابيات شعرٍ تزفر الضيـق للحـال=ماهو قصيد اللي ..تلبّـي عبيـده
المرتكي مابنشـر ابتلعـة الجـال=وفك الكفر والضيق ينهش وريده
بأرضٍ قفر ماطبّته روس الانـذال=مبعد عن ازعاج البشر مايريـده
جيت المكان اللي به الرجـم لازال=يشرف على بقعاء سنينٍ عديـده
ومدّيت شوفي وانتشل فكري امثال=قد قالها راكـان بأجـزل شريـده
[هذا ولد عـمٍ وهـذا ولـد خـال=وهـذا رفيـقٍ] للمراجـل وليـده
وحسّيت من تحت القدم هز زلزال=صوت الحجر موّل تواقع نشيـده
تواقعـت للوقـع والوقـع قتّـال=من ضيقةٍ تقتـل حيـاةٍ سعيـده
الله على وقت التفشخر بالاشكـال=كـلٍ يـدوّر صورتـه بالجريـده
والله على وقت التمشيخ بالاموال=كلٍ يشيل المرجلـه فـي رصيـده
هذا ولد صيتٍ وهـذا ولـد مـال=والفرق شاسع والكواكـب بعيـده
لكن زماني كفّن الصيـت بزمـال=وحط النصايـب للمراجـل فقيـده
وفكّيت ازرار الثوب للضيق موّال=ولقّيت صدري للهبوب الشديـده
هبّي على صدري بـرادٍ وشـلال=يطْفي جمر قلـبٍ تلاهـب وقيـده
وغمّضت بعيوني ونا اشوف خيّال=فارس تعلّا فوق شقـراء عنيـده
شكله عجيبٍ بالوصف يذهل اذهال=عقيـد قـومٍ مامكـن هالعقيـده
قال الصبر مايكاتفه غير الآمـال=امّـن حياتـك بالأمـل لاتزيـده
قلت الحياة احزان وافراح واهوال=وانا حياتـي كـل ابوهـا فريـده
مستفردٍ شعب الشقاء بخافقي حال=قلبي جزيره والحكومـه رشيـده
ياما صبرت وصبري للحين مانال=مفتاح بابٍ00 محْلي هيكل حديـده
مالي سوى اللي مثبّتٍ كل الاجبال=الخالـق المعبـود حنـا عبيـده
استغفرك وادعوك وارجيك لو طال=وقت الفرج للحظ الاقشـر قريـده
وفتّحت عيني واختفت كل الازوال=اثر الشعر حـرٍ كفـخ للطريـده
يدلي على الجزلات للجزل مدهـال=ماله على صيد الهزايـل مكيـده
عشّيت طيري وانتهت قصة الحال=واقفيت اموّل للمواجـع قصيـده