ألا ليت السديري من قبره يقوم=ويطلع علينا من حضيض المقبره
ونستقبله بالورد في حال القدوم=ومن شانه التكريم كلٍ يحضره
وبعد الضيافه يبتدي سرد العلوم=كلٍ يقول اللي في باله يذكره
أول بدا شعر العرب يشكي هموم=من بعدك يالسديري كلٍ بعثره
بين البراد وبين لفحات السموم=وعظمه كسيرٍ مالقى من يجبره
الشعر يشكي من تصاريف الرخوم= باسم الشعر نشوفها مستشعره
من شان جمع المال للمعنى تسوم=تبيع وتشري الشعر مستسعره
وغير المهايط والجشع مامن لزوم=إسأل حبيِّب واسأل معه منقره
كم شاعرٍ شفناه من فوق النجوم=على حساب الشعر يوم استثمره
وكم شاعرٍ يدفع على شعره رسوم=من شان شعره بالمحافل يظهره
وكم شاعرٍ قال انا الشاعر اللطوم=هذاك ودك لاتكلمح تقهره
ودك تصده بالدفاع وبالهجوم=حتى المعاني من جزيلك تحشره
وكم شاعرٍ يقول انا مليك الروم=القاف ماكسره وغيري يكسره
ماكل من طب البحر يقدر يعوم=والموج لاجاه الإعصار يطمره
وكم شاعرٍ من اللي ذكرنا محشوم=جزيل المعاني والمشاهد يشكره
اللي لاطب الميدان يسد اللزوم=ويجيب لك صدق الخبر من مصدره
عزيز نفسٍ ماهو للجشع يروم=والشعر ماهو بالمطامع يخسره
ومن بعد ذكر الشعر نذكر السلوم=عاداتنا نشوفها مستنصره
شيٍ خلا العقِّيل تشق الهدوم=ماتسمع بالمجالس غير الثرثره
وياكثر مايحصل فيها من الشتوم=واليوم الطيِّب اللي يطيع المره
وشفنا القرايب جت للقرايب خصوم=حتى الأخو ماصار اخوه يقدره
ولامن ذكرنا اهل النخاوي والعزوم=يطلع لك منهم من المليون عشره
هذا الذي عندي والمعارض يقوم=ويجيني ويعمل معي مناظاره
وتم الكلام اللي ماقلته بالعموم=واقدم لكم ياهل الطيب المعذره
يالله يالمعبود الغفور الرحوم=تجعل على قبر السديري مغفره