صبرك على زلات الاصحاب يرفعك=والصبر هوســاس الفخر والرجوله
لوكان شـيطانك على الغيض يدفعك=الجم لســــــان ابليس واهزم خيوله
بالصــبر تدرك ماتبــي مــن منافعك=وبالصــبر تدرك عنفوان البطــوله
علــــى القــرابه لاتوجّه مـــدافعك=احلم علـــى جــهالهم والكـهـوله
تر الرفاقه حقهم من شــــــــــرايعك=في نص كتب الله وســــــنة رسوله
وسكر عن اصحاب النمايم مسامعك= اللي على الاجواد يشــــــعب ذلوله
ابعد بذور الحنضله عـن مــزارعك= لاتتركـه يخــرب عليك امحصـــوله
ياجاك دلاّ بالســــــــــــــوالف يلمعك= وان غبت غير هرجه اللي يقوله
يبدي لك الحســـــــنا وياغبت يلقعك=يكتب ويمسح ماكتب في ســــهوله
يدخلك فـــــي وهم المدايح ويطلعك= ومن الحســـد والحقد يملا حثوله
عقرب ثرى يســــــتغفلك ثم يلسعك= تحمل ســــموم التفرقه في ذيوله
جنّب طريقه واهجـره لايجـــي معك= تنهـج مناهيـجـه وتفعل فـعوله
علـيك باللــي مـع رفـاقتك يجـمعك= اللـي علـــى الجمعا تدرهم ذلوله
قــرمن وجوده طمعتن من مطامعك= ساس الوفا من يوم سن الطفوله