يوم الثلاثاء بالعقاريه صدفت النايفه=بغيت ابرمج هاتفي لكن فقدت الذاكره
انا وراع البرمجه امورنا متخالفه= كل مانهرته قربت قالت علامك ناهره
قلت المعفن مثل منتي يالعزيزه شايفه= خرب لي الهاتف وانا ماغير عيني تناظره
قالت لي اهدأ تر انا توي عرفت السالفه=وشهو يفيدك لو زعلت وقلت كلمة قاهره
قلت امري لو طال عمرك هالخساير كالفه =حتيش لو ان الرصيد وماملكته خاسره
يكفيني ان قلوبنا من شوفتك متوالفه=وانا اشهد انك يابعد حيي فتاة ساحره
انا مسير للحفر واسكن ترى بأطارفه=وامشي بعد بكره صباحا في تمام العاشره
قالت تؤجل سفرتك شفني تراني حالفه=هذي ارقامي واتصل انا تراني ناطره
قلت ابشري ثم ابشري لعيون عين النايفه=قالت تحياتي وانا ياصاحبي لك شاكره
ومشيت انا من عندها وقلوبنا متهاتفه=وعيني على رقم الفتاة اللي مميز اخره
حفظت رقمه قلت ابي يوم الخميس اهاتفه=ويوم انتصف ليلي توقعت الغزيل ساهره
دقيت اكثر من خمس مرات وشهي السالفه؟=قلت احسن ارسل له مسج ياعل باقي ذاكره
قلت اسمعي انا فلان اشفيك كنك خايفه=اليوم موعدنا عسى يابنت منتي ناكره
بعد الرساله قلت ادق مادام اسمي كاشفه=الو نعم قال المباحث يم جنابك حاضره
ازعجتنا وابلشتنا والنوم ماني عارفه=خلاص حددنا مكانك والجنود تحاصره
اثر الخبيثه ملكعه ماضن فيها عاطفه=تبي تجرجرني وانا صدقت هرج السافره
لكن وكاد الحادثه خيال قصه هادفه=ماهي حقيقه والعذر ياهل العقول الفاخره