ضاق الخفوق وزوّد الضغط فيني= بعض المجالس سايدينه حواسيد
روابع والهجس يظهركنيني= جور الزّمن يقصي على كل صنديد
ياضاق صدري من هجوس تجيني= نأخذ مع البيدا حدور وتسانيد
بعد الديار ولا عدون بطيني= ياصار مايمناك ترفع عصا الغيد
نبعد عن الحاسد وأبو نيتيني= وبعدك عن اللي مايودّك هو العيد
الحسد شين وناقل الشين شيني= مثل المرض يضعف سلوم الأجاويد
صفه قبيحه ومنهجه منهجيني= يلعب على الحبلين مايضبطه قيد
اسمه نزل من دفتر الصادقيني= منسوخ من كل القيم والمواعيد
إلاّ العشاير يتركن الحنيني= ويرحل جبل حايل لحزم الجلاميد
وسنام يرحل غربي القريتيني= وضلع الرعيله ينتقل شرق من فيد
طبع الرجال ومنهج الغانميني= صفات سمحين الوجيه ألأواليد
دين ودنيا مذهب الطيبيني= مثل الذّهب مافي عليهم مناقيد
وأرزاقهم من عند منش الغشيني= مدّه ولا مد اليدين الكواديد
ما دام بالأيام شينٍ وزيني= تدور دنيانا على زيد وعبيد
تطرب على فواجع الغافليني= وتلعب على قضاض ملك الصناديد
تقفي وتقبل وتفجع الأمنيني= ونهاية المشوار ملفاك ترقيد
بقبرٍ يحفظ اللي بهاء ساكنيني= دام الدّهر وسود الليالي سراميد
وصلوا على صفوة قريش الأميني= ما صفقت هوج الهبايب جليعيد