تبقين يا منيفه على اسمك منيفه=يا معانقه غر المزون البعادي
يالطــايلة يالثابــــته يالكليــفه=غلطان من ظن ان مرقاك عادي
انا خــبرتك كــل وقت مريفه=انــواع نبتــك وافره بالوكـــادي
مرباع حذرات البدون ومصيفه=يرعن نبات المرتفع بالوهادي
تسكن بحد اعلاك من غير خيفه=مزبان هاذي حيلته لا تصادي
جيت ورقيتك يوم حالي خفيفه=باول شبابي كنت بالعمر بادي
واليوم ما اقوى ارقاك حتى النصيفه=وان قلت ابي راس الهرم قيل غادي
ملسا المراقي ضلعتن مستهيفه=يالراسية مرسيك رب العبادي
خلقك خلاقك بالارض النظيفه=باوسط صحي جيتي على جال وادي
واحاط من خلفك جبال رديفه=حمرن على سمر الرعيلة تقادي
بأجا الذي فيه الهبايب لطيفه=شمة نسيمة متعةٍ للفؤادي
ولاهله سلوم بالمراجل مطيفه=شمر هل النخوة لصوت المنادي
احفاد من يكرم بماله بكيفه=حاتم بطيبة نفس بالمال جادي
ما بات يشكي له بالجوع ضيفه=دليل ذلك يوم نحر الجوادي
رغم الزمان اللي شحيحن رغيفه=في صلف الايام القصاف الشدادي
وبأجا الشواهد باقي في مقيفه=القبر والمنزل وسود الهوادي
وفيه النخل طلعه فرآ وسط ليفه=يغني هله بالتمر وقت الجدادي
ايضآ النبات اللي قليل وصيفه=غابات اجا الخضرا به الجو هادي
وعذب القراح من المنابع ذريفة=نبع الصفا ما طلعته الايادي
وبطحاه عندي مثل زرع القطيفه=يصلح فراش وثم يصلح وسادي
عسى السحاب اللي يشوق رفيفه=سيله ليا منه تمثناه زادي
حيث ان لي به ذكريات كثيفه=عاد القديم ولا ادري كيف عادي
اجا ملآذٍ بالسنين القصيفه=من مبتدا شرقه لغربه سنادي
يعرف وقلت المختصر بتعريفه=اشيد به من عرض من فيه اشادي
في ضف حائل يوم كانت عنيفه=يوم المعارك تتطحن والطرادي
بالخيل والا موميات السفيفه=ياما امتطوا سرجآ وركبوا شدادي
ذباحته باسلاح يرهب رجيفه=والصارمات المرهفات الحدادي
كم فارس يضمن ليا ادلى بسيفه=او ناش في سبابته للزنادي
لعيون اجا وعيون عذرى عفيفه=حآئل تذود بقوته للمعادي
وارجع على منيفه علومه طريفه=كنه تسولف بالقيم والمبادي
تبدي لي اسرار الوليف لوليفه=افهم عليها زين لو هي جمادي
احيان لو خاطبك حي تعيفة=ما كل قولن يوصلك للمرادي
رايي كذا ياهل العقول الشريفه=وعلى الله الحي العظيم اعتمادي
فيه الامال اجزال ماهي ضعيفه=بالماقف اللي به بياض وسوادي
هذا وما خط القلم بالصحيفه=صلوا على راع الهدى والرشادي