لا لا تليكع ياجويهل نعْرفك منْت بلكيع = وكديشك اللي تسرجه حدك على جوع وضمى
الشمري اللي بليته عن وطا قاعك رفيع= ترْجل الخيل الأصيل وشام بالنفس وسما
هذاك ((حرٍ)) ماكره معروف ياطوير المريع = مايجهله الا ضريرٍ صايبٍ قلبه عمى
شفني مع اشكالك ومع ماجدت به بالي وسيع = واللي تبي تضحك معه اضحك وخله محرما
انا ادري انك حولها وافهم ترى عقلك وضيع = والعاقل اللي يحترمها ولحقوقه يفهما
حماك معسوسٍ قبل عامين يوم انه ربيع = يوم اللبن يملا صميلك والعرب تجلب كما
واليوم اجبرك الزمن تخضْع لواقعك وتطيع = وتنزْل خشيمك قبل عينك ترْزه للسما
حيلة بليس لو تمشيها وصدقْها الشجيع = ماشـفـت رميه فوق راسك يالمسيكين احتمى
هذي حروفي وانت فسرها على ماتستطيع = والا أقول افضل تريْح ماانت فيها ملزما