شوفوا بعيوني تمــوت براءة اطفـــال=طــهر انــقتل .. مدفــون في امنــاتي
ليل وشقى وهــــموم وجروح ترحال=غربه تلاشى .. في دروبي جهاتي
ياناشد عني تعال انظر الحـــــــال=مات العــــــزا وكفنوه بغــــــلاتي
شيٍ عرفته مــــايسولف وينقال=وشيٍ كتمته به يسولف سكــاتي
قوافل الذكرى متاهات واهــــوال=والليل موحش حلمه الصبح ياتي
وين الابو ياعم !! والام ياخال !!=وين الامل من هــو يلملم شتاتي
وين الي يلبس دايم شمــاغ وعقال=وليا طحـت جاني وقال لي ياحياتي
وين الي شالتني معه بكل الاحوال !!=وضحت بعمره وكان همه نجـــاتي ؟؟
الي تحت رجلينهــــا جــنان وظــلال =ماعـــاد لي دعوه بختم الصـــلاتي ؟!
كــذا وحيده ؟؟ غير عن كل الاطفـال=لا اب ..لا ام ..واخـــو .. لا خـــواتي !!
بدمعتي مـــــــامــات حرمه ورجـــال=مــــــــاتت بعيني فرحتي وامنـــاتي !!