لاتدنى العزايم وانت سامي مرام = الرياح العواتي ماتهز الشمم
القوافل تسير وكل شي(ن) تمام = في خطاها ثبات وفي اذانه صمم
كل صوت(ن) طويل(ن) نعرف انه سلام = ماعسرنا التفاته بس تابى الهمم
مثلنا ياغضبنا مزنه(ن) له ركام = يمتلي به وسيع الكون سيله طمم
وان رضينا سنام وفوق ذروه سنام = وان طلبنا المعالي كود روس القمم
يبلغه من تعب له مادركه من ينام = كم قضى في سبيله قبلنا من امم
متى تفنى العظايم عند صبر العظام = في نزول المصايب واحتدام الغمم
بين معنى الحلال وبين معنى الحرام = تلك امور(ن) تشابه وش فوادك ضمم
مثل بعض المذاهب عند بعض الانام = ارتكاب الكباير واحتراز المم
ماشغفنا اهتام(ن) وش تقول العوام = وش مقاله تجار القول واهل النمم
مافي حبل الخلايق قوةً واعتصام = لو يجونك بمدادن من جميع اليمم
ماوصلت لمدانا ولا بلغت اهتمام = اوسط الناس شان ولانبيع الذمم
وش لنا بالسرادب امهات الظلام = لو نفتش دخلنا في امور(ن) جمم
هنا كف السوال وكل معنا خصام = لاتلاعب يديك النار فيها الحمم
لايطول الجدال وعند مسك الختام = ذاب شهد القصيد وكل معنا تمم