ياضاق صدري وأن تكدّر مزاجي= ركبت فوق اللي يشوق أنزعاجه
فوق أسرد ماطب سوق الحراجي= شد الوكاله ضابطينه خواجه
ياقام يطمي بالسّهال الـرواجي= يصفق هبوب الريح مقدم زجاجه
بعض المجالس ماتناسب مزاجي= وكثر التّشمّت يالبناخي سماجه
بعد الدّيار ولا مريضاً تراجي = ياصار مرض قلبه صعيب علاجه
وسوالف مابين عاجي وماجي= ولاهو يميّز عذبها من هماجه
هلوس الرجال اللي سوات الدجاجي= أهل العلوم السامجة واللاجاجه
بعدك عن اللي مثل وصف النعاجي= كبار النفوس اللي تقل لون عاجه
بعده ربيع القلب والأنفراجي= مع السّهال اللي به الريم داجه
مالي بهم والبر لي به مداجي = والله كفل رزق العباد وخراجه
شوف الخزمي رغبتي وبتهاجي= عندي ولا مقابل سمي الدجاجه
مشيك مع البيداء وساع الفجاجي= هذا هواء بالي وهذا مزاجه
أحب مشي البر لوبه عجاجي= ياقام خشم الجيب يطوي فجاجه
يقطع بنا دار السّهل والهباجي= زماء سرابه وشهب البعد ماجه
هذا علاجي كان تبغي علاجي= لو كان تتعبنا الحرور وعجاجه
والعمر مايذريه كثر الملاجي= ولاتنحفظ روح العباد بزجاجه
لابد من يوم يصير أنزعاجي= من دون اللي تغلي تحول الزراجه
بالبعد وإلا بالممات المفاجي= لابد من يوم يجي به صجاجه
ترجمت مابرمج لساني وهاجي= والخاتمة على الولي أنفراجه