يامن بغيت الشّعر ناديت له تم = جاني كما سيل تحدّر من القور
بكيفي وطوعي حاظرٍ مايتلعثم = من خافق وسط الحشاء فايرٍ فور
ومن بعدها ناديت ياغافلٍ قم= ومن لأتّعظ بحداث الأيام مغرور
أسجد للي كونك من المي والدّم= بين التّرايب وعظم الأصلاب محشور
ياماكث وسط الرحم مأنت مهتم= لا ناقصٍ رزقك ولا زاحمك جور
وسكنت في دارٍبه النّور معتم= في ظلمةٍ وسط الحشاء مابها نور
في بطن اللي بوسط الحشاء ضمتك ضم = داخل حشاها تنقلك سبعة أشهور
ومن بعدها جسمك خرج ونمتك نم =ساعة نزولك باكي مأنت مسرور
ويامن بكيت أمك تجي قبل تزهم = لو أنت بأيدينه سمن مأنت منثور
غريب ماتعرف من الخال والعم = كنّك مريض الجسم والعظم مكسور
وبعده كبرت وقمت تدرك وتفهم = تفهم حقوق الأم والأب له دور
حتى كبر جسمك وعمرك تقدّم = سبحان خلاقك وبالشّكر مشكور
أبا أنصحك عن غيضهم ولا تغظلم = لو تعتذر ياخطيت تر مأنت معذور
لهم حقوق لازمة لا تغيشم = لا تطاوع الشيطان وتكسب بهم زور
تره حريص يعكّر المي لك سم = ويرميك في دربٍ مطبات وحفور
وأن طعتها تأثم وتوزر وتندم = وتكسب عواقب طاعته ذنب وشرور
أكبر عدوٍ لك ولا ظن يرحم= من طاوع الشيطان مايكسب أسرور
خلّك صديق أمّك ولأبوك قل سم=ياماء سهروا عليك بالبرد وحرور
يسعون لك بالرّزق ولو قل تطعم= يوم أنت في سن الجهل طيش وغرور
هذي وصاتي وأنت بالشّيء تعلم = أكسب رضاهم وعند الأإله ماجور
والعمر مهما طال لابد يردم = حدر الحصاء في داخل الأرض مقبور
يالله طلبتك تغفر الذنب وتعم = في رحمتك وجعل لنا الذّنب مغفور
وصلوا عدد ماعسعس الليل وعتم = وماسار نجم بالسماء وشع له نور