ياهيه ياسيدالبني المزائين=يالي عليك من الجمال انسكابه
اسمح لي اكتب كلمتن بين قوسين={بينك وبين ام الغزيل تشابه}
ليتك خوين لي على العسر والين=ونروي عطشنا من دموع السحابه
في خايعن يطرق هواه المحبين=حيدن نفود وحيد روض ورحابه
ونبعد عن الحساد هم والشياطين=وايضا بعيدن عن عيون الرقابه
في روضة التنهات لو بس يومين=نمشي مع الروض الخضر والشعابه
ماحولنا كودالعصافير سالين=ترقص على عزف اللحن والربابه
وإن قالها الله نجتمع كل شهرين=من منتجع شرماء ايلا اطراف طابه
ويلا القا يامعذب القلب والعين=يالي سكنت بخافقي واعتنابه
سكنت فيه بفلتينن ودورين=وضيعت مفتاحه عقب صك بابه