ضلعٍ بغرب تمير عديت عاليه=قبل أمس في وقت الغروب أعتليته
قلت الهموم آتفارقاً عند ماجيه=وآشوف همي زاد من يوم جيته
قلبي بعـد مرقاه كثرة طواريه=ياليتني يابو نمش مارقيته
ذكرعلي شخصً نحبه ونغليه=سافر وخلاني وأنا ماهقيته
يذكر عليه كل وقتٍ نصليـه=وان شفت مـن يشبه لزوله بكيته
سـاق الـركايـب وآتجه يم والـيه=من ساقهن يابونمـش مارجيته
على النعـش شالوه والناس تتليه=من ضمنهـم يم المقابر تليته
عليه دمع العين بانت مواريه=رجل الشماغ وجيب ثوبي مليته
لوجيت عن بعض العرب ودي أخفيه=يابو نمش يامسندي ماقويته
يابو نمش لو غاب مانـي بناسيه=أبتبـعه يامسـنـدي مانسيـته
الموت حق وكل عـبـدٍ ملاقيه=من خلص الأيام يرحل لبيته
بيتاً سكنبه عارفه وينهو فيه=لاشك ماقدر جيته لو بغيته
لقيت حراسٍ على الباب تحميه=قالولي إرجع وأمرهـم ماعصيته
قلت إسمحولي ودي أدخـل وآناديه=وأناآدري إنه مايجي لو دعيته
خلوني أدخل يم قبره وراعيه=من عرض مـن زار المقابر لميته
قالوا لنا وش ينفعك يوم تاتيه=الطين دونه وإنت بيدك بنيته
قلت أتونس يوم ادوج حواليه=وأرتاح لو بالمقبره مالقيته
وختام قافي نطلب الله ونرجيه=يارب تغفر ذنب عبـداً خذيته
تم الكلام ونذكر الله بتاليه=عد النبات وعـد من ماطاف بيته

يالله ياللـي كـل حـيٍ تعافيـه=ياحامين من ابرهه سـور بيتـه
يالواحد اللي كلنـا دوم نرجيـه=يالله ياللي كـل عـاصٍ هديتـه
ياعالمٍ ماقـال عبـدك ومخفيـه=ياواحدٍ كـل الخلايـق حصيتـه
ومن بعد ذكر الله هلا والف لبيـه=بالشاعر اللي بالوفا ذاع صيتـه
صوتك وصلني ياهلا والف احييه=اهلاً هلا واهلين حـزت قريتـه
الحـر مثلـك عاليـاتٍ مراقيـه=روس الشوامخ منزله يانصيتـه
بالطيب والطولات دايم مماشيـه=ينطحّك بالترحيب يامـن لفيتـه
عوض ولد مخلف زبون المشاريه=اللي ليا ضكـت سنينـي نخيتـه
يذكر عزيـزاً اتجـه يـم واليـه=ويقول انا من روحتـه مارجيتـه
العبـد يامشكـاي لله مساعيـه=لابـد ماتقضـي دروبٍ مشيتـه
الموت حق وكـل حـيٍ يلاقيـه=لو هو طريقٍ ياعـوض مابغيتـه
حركت شيٍ داخلي كنـت مخفيـه=له صفحةٍ في داخلـي ماطويتـه
لو طالت الأيـام مانـي بساليـه=يطول وقتي ياعـوض ماسليتـه
حبه بقلبـي شامخـاتٍ مبانيـه=وان قلت ابنسى ياعوض ماقويته
الشعر مايرثيه لو قلـت ابرثيـه=يجف شعري ياعـوض مارثيتـه
لاشك نطلب عالم الغيب يسقيـه=من حوضه المبرور وامره رضيته
حيثه رحوم وكل شيٍ لـه وفيـه=ماغيره احدٍ بالظـروره دعيتـه
ياناصر المظلوم من زمرة التيـه=ياواحدٍ كل المصايب جليتـه
وبختامها يـارب زيّـن ملافيـه=شخصٍ خلقته ثم بأمرك خذيتـه
وصلاة ربي عـد من قاـل لبيـه=على الرسول اعداد من حج بيتـه