وسط المليدا عالي الرجم نطيت = رجم ٍ طويل ٍ يدهله كل عاني
وسويت لي فنجال منه تقهويت = وناديت شيطان المعاني وجاني
وطرا علي مظنون عيني وهليت = دمع ٍ حبسته.. بالمليدا عصاني
وياراكب الفكسار صخن له الزيت = ودزه عشان الولف ولا عشاني
من وارد اليابان لامن تهقويت = ما يأخرك عن مطلبك لو ثواني
منصاه ابن عمي ليا من تعزويت = الصاحب اللي بالجمايل بلاني
فلاح انا لو قلت ياليت ياليت = ماتنفعن ياليت عشري ثماني
لامن طرالي داعج العين فزيت = ابوجديل ٍ وصفه الليل عاني
وابو خديد ٍ كن خده كما الليت = مبروم ساق وعودها خيزراني
وجدي عليها وجد حي ٍ على ميت = أو وجد منهو بالعنايه يعاني
قبل ثلاث سنين قفت وقفيت = قفا وفي معلوق صدري كواني
واليوم في دار ٍ رجاله مكابيت = شرقي جنوب العاصمه بأتزاني
بالخرج وأهل الخرج عندي مناحيت = خذو عشيري يوم ربي بلاني
منساه دامي حي والعمر توقيت = ليـن النصايب فوق قبري مباني
ذي قصتي مع منهو بصدق حبيت = وابي النصايح ياسهيل اليماني