بسم الولي بديت بدع المثايل = وحياكم الله ياعيال الحمايل
تحية الحضار أهلا هلابكم = عد النبات وعد ماقال قايل
تحية أحلا من حلا صافي العسل = ولربعنا الغياب نرسل رسايل
ونقول للجميع جودوا بمالكم = ياهل الكرم ياطيبين الفعايل
هذا محل الجود ياجاد حضكم = والأجر والمعروف صدق صمايل
وإستبشري يارينبه في عزومهم = على عزوم القوم عندي دلايل
ربعي هل الناموس حماية الجبل = هل المناخ وهم عيال الأوايل
فتحوا طريق سقوفهم ماتوانوا = بدفع الفلوس وذبح كوم(ن) جلايل
من مفرق العقلة لحد العرفاء = شالوا جبال في طريقه هوايل
واليوم دور ارينبة من ديارنا = أرينبات وموقعه قرب حايل
من قبلي الديرع لصفراء ظواله = اللي لهم غرس بتلك المسايل
عليهم الواجب قبل دور غيرهم = وباقي الجماعة يدركون الجمايل
الطيب والنوماس يبقى مخلد = والعمر هو والمال لابد زايل
يامشترين الطيب هذا محله = والمال ماطيب رجال بخايل
ننخا هل الفزعات اليوم يومكم = ومايذكر إلا كود طيب الخصايل
وشكراً لمن ساهم بغالي حلاله = ولكل من يسعى لكسب النفايل
والرحمة المسداه لموتى ربوعنا = وأخص أبو فيصل فقيد المثايل
عبدالله الفرج عسى الله يرحمه = كم قال بالديرة بيوت جزايل
في جنة الفردوس يارب مسكنه = رجل بنضم القيل مثله قلايل
وتقديري العالي لجميع شمر= ستر العذاراء ناقضات الجدايل
شمر هل العادات والمجد والفخر = لباسة المرعز على الراس مايل
تاريخهم سجل مداده من الذهب = ياعد تاريخ العرب والقبايل
وصلاة ربي عد ماذعذع الهواء = على الرسول إعداد وبل المخايل