قالوا تمثل قلت ياناس خايف = اخاف ماوفي بحايل وصايفه
وبديت في نظم البيوت الطرايف = بالديرة الي بيوت أهلها مضايفه
تشوقني حايل ولاله وصايف = انشهد إنه بين الأقطار نايفه
نظافته كل شهدها وشايف = مثل الثرياء وباقي المدن ألايفه
كل شهد له من جميع الطوايف = مثل العروس أجا وسلمى ردايفه
فيها كرم حاتم على الناس طايف = تاريخ دون بالذهب في صحايفه
ويوم السنين الغابرات العجايف = حايل تعيش أمان والناس خايفه
شمر حموها بالحداد الرهايف = من كل غزاي بغاها وحايفه
جاه الشريف وذاق مر الكسايف = المعركة زادت عليه بكلايفه
شمر حمول الخيل ماهم خفايف = عدوهم ذاق الكدر مع كسايفه
واليوم حايل من خيار المصايف = بسعود أميره والهبايب مسايفه
عاشت حكومتنا وعلى الأمن نايف = وعسى يزود الخير وتكثر وظايفه
وصلاة ربي عد ماطاف طايف = على الرسول أزكى صلاة ولطايفه