ياراكب اللي يدْني البعد ممشاه=حرٍ عماني(ن)من عمان شاريه
الاشعل اللي وافياتٍ حلاياه=بالحب هو شريك محبوب راعيه
مافوقه الا خرجه وزاده وماه=مسافة الطرقه عساها تكفيه
عزالله انه منوة اللي تمناه=لادق به هاجوس قلبٍ معنيه
اليا طراله زين الاوصاف سرَاه=والا جهم مجهام والبعد يطويه
ياقرب مصباحه وماابعد معشَاه=يقطع مسافات الخلي التهاتيه
راعيه يوم الشوق والبعد عناه=يبيه يم اللي يوده يوديه
يبى وليفٍ عذب القلب واشقاه=وده يشوفه لكن البعد حاديه
مع ضف بدوٍ همهم ناقه وشاه=من وين ماطاح المطر حالوا اليه
البدو غربال القلوب المشقاه=كم فرقوا مابين غالي وغاليه
لكن دام شعيل موجود ودّاه=ممشاه درهامه عسى الله يعافيه
يوصّله للصاحب اللي تنصّاه=لو دونه جبال وصحاري ولايتيه
ماهو ونيتٍ غبّر الجو عجاه=وصوته يعلم فيه من كان يوحيه
وليا عرضله عرق ثم قام ينحاه=عن الطريق اللي قبل كان ناصيه
وان كان به وادي ليا شاف بطحاه=يرجع ورى يخاف لايندفن فيه
وان كان في دربه وعر ماتعدّاه=وان كان به غراز ماهو بماشيه
وان كان به سيل وهلش يلبس حذاه=ويمشي ولو يجرح قسا الارض رجليه
وان انقطع بنزين وقّف وخلاه=وليا خرب لاشك ماهو مسويه
راع الونيت يميل ياسه برجواه=ودايم ونكبات الخطر قدم عينيه
وراع البعير الهم والبعد ينساه=وعلى الطريق اللي يريده يمشيه
لاارخى الرسن ثم قام بالصوت يشعاه=من سرعته مايميز الارض راعيه
الحاصل ان الحر مااحد يتحداه=لو كان جيب الشاص يعجز يماشيه