’’’ أستأذنك بسافر أيام وأجيك ! ’’’
قصيدة مؤثرة تخاطب النفس بشجن ..
ولسان حالها يشكو قسوة زمن ..
قصيدة استأذنك / للشاعر حمدان المري
اتركم مع القصيدة المسموعـة ونص القصيدة المـقـروء ..
أستأذنـك بسافـر أيــام و اجـيـك
وان طالـت ايـام السفـر لا تحاتـي
حتـى لـو طولـت مانـي مخلـيـك
ياللي بدونك ويـش تسـوى حياتـي
تامر على حاجه ؟؟ بأودعـك واليـك
عسى عوض الايـام فـي المقبـلاتِ
حتـى يـدي ماودهـا تفـارق يديـك
ساكت وانا اشوف البلا فـي سكاتـي
ما شفتني لا رحت منك التفـت فيـك
بـلاي والله روحـتـي و التفـاتـي
لكـن قبـل مـااروح ودي اوصـيـك
وانت الوحيد اللـي يقـدر و صاتـي
لاحـدٍ سالـك و قالـك ويـن مغليـك
قـل لـه لـوازم لا قضاهـا بياتـي
وان طروا النسيـان مانـي بناسيـك
يا راس مالي فـي الحيـاه و غناتـي
وان طروا السلـوان مانـي بساليـك
طيفك معي حتى وانـا فـي صلاتـي
قلبـي وهـو قلبـي اذا مـر طاريـك
لـولا ضلوعـي كـان عـزو مماتـي
لو جض صدري كـان يمديـه ياتيـك
ويبـات عنـدك و يهنـا بالمبـاتـي
انا .. وقلبي .. والغلا .. ساكـنٍ فيـك
وانته .. وقلبك .. و الغلا .. وسط ذاتي
غـلاك مثـل الحكـم عنـد المماليـك
اكبر طموحـي .. لا .. كـل امنياتـي
شف في غيابـي أي حاجـه تسليـك
لانـي بعـدك اسلـى مـع ذكرياتـي
احـاول اذكـر أي شــيٍ يطـريـك
واقول هو سـوى وانـا ذي سواتـي
كنـي مـوادع كـل شـيٍ حوالـيـك
وكني حسبت حسـاب حـزة وفاتـي
احـب لانـي مقـدر انسـاك و ابيـك
ولا اقـدر اخليـك يالـلـي تحـاتـي
معنى أحب..وما اقدر انسى..وأخليـك
يعني بدونك ويـش تسـوى حياتـي
|