يااللي كتبت من اجل عينك حروفي=وش بك على هجر الذي دلعك عجْل
ارحم خفوقن يرتعد وسط جوفي=قدّر تناهيد الغلى واجمع الشمل
كنت احسب انك في حبيبك تروفي=وكنت احسب انك سيد الحلم والعدل
انت الغرام ومهجتي وانت شوفي=وانت الغلى والروح والحب والخل
تدري احبك مانت ناقص حلوفي=وادري معي ضحيت با القول والفعل
اخاف لافارقت تشقى هنوفي=ويقال لك يا بنت ما طعتي العذل
وتشمت بنا العذال يا خوف خوفي=الفتنه اقسى يا الحبيبه من القتل
ومن عقب ماني باولات الصفوفي=اصير عند احبابنا مثل ابو جهل
وتضرب ورانا مزعجات الدفوفي=ومثل النعامه ندفن الراس با الرمل
وعقب الغلى نبدأ نحب الكتوفي=ومن عقب صاف الورد نشرب من الحثل
يا شمس حايل لا يصيبك كسوفي=اللي وصل با الحبل ما يقطع الحبل
ان كان وجداني تقدّر ظروفي=اكيد لو لحظات بعده مهو سهل
تدرين بك عندي على الناس نوفي=ردي علي (تكفين) يا قمة النبل