جيت اتناسى والتهي عن طواريه=وانسى زمانٍ فيه ياما رجيته
وانساه وابعد رامعي عن محاريه=لقيتني في محجره مانسيته
العام كن الوصل عُمَّر مساريه=ومامر يومٍ شاقني ماسريته
واليوم وصله دهدمنّه ذواريه=ومن البطى ماكن يومٍ وطيته
احترت مدري بالجفى كيف اجاريه=واعطيه شيٍ مابعدني خذيته
ودورت فيني للزعل والمشاريه=ولا لقيت الا الغلا يافديته
هذاك لو غيره من الناس زاريه=مازريت من وصله ولكن زريته
ماغيره اللي بُعده القلب فاريه=ولاغيره اللي ثكنة القلب بيته
احيان احسّه في عروقي مجاريه=وكنْه يتمشّى في ضواحي مبيته
واحيان احس انه نعس ثم اداريه=ان نام نمت ولاصحى ماصحيته
سلمتله روحي وبالود شاريه=واليوم ماكنه ندهني وجيته
في مامضى نزل العرب في حواريه=واليوم مدري بيّ روضٍ غديته
له عندي الذكرى على الطيب اماريه=والله يحلّه صاحبٍ مانسيته