رميت شباك العنا مير ماصاد = حظي رمالي بالشبك حر مملوك
مسكوا جناحه والمخالب بها قياد = مبروك لك ياطير والفين مبروك
عسى طريقك ماتجي فيه الانكاد = وارجوك سامحني على الغلطه ارجوك
زود ٍ على مافيك ماعاد تزداد = فات الآون وصرت ياطير مشبوك
دعوى بلا قاضي ولا عندي إسناد = لو جيت أحاول فيك بالغصب فكوك
حطيت لك مع خيلهم سرج وشداد = لو جيت تطلب عفوهم منه معفوك
يصغر مقامك عندهم دون ترداد = وتزعل خواطرهم أليا جيت شافوك
اصبر وقرب لاتحاول بالأبعاد = من خوف كلمة روح مع ناس غووك
أخاف أنا وياك للحب ننقاد = نزرع ثمر وردي ونحصد بها شوك
ويصير كل اللي عملناه مافاد = أنا حدوني عنك وانته يحدوك
واعلم ترى جرح الهوى شوك الأكباد = صعب ٍ يداووني ويصعب يداووك
والله ماقلته لكم كذب وعناد = مير البلى من بينا الدرب ممسوك
هذا وقلبي صد ماعاد ينعاد = وانته موفق مع ربوع ٍ تولوك
وقفت عن درب الهوى فى أخر الماد = قريت قصة واحد ٍ فيه مدروك
بس اعتبرني صفر في وسط الأعداد = تكميل خانه بين ناس ٍ يحبوك