يالاجودي مانيب خايف مناقيد=ولاني من اصناف البنات البليده
والله مالي من طرفها مقاصيد=إلا كلام الناس قامت تزيده
حذفتها مابي اسبب لواهيد=والناس تشعل في مرامي وقيده
قامت تركبها على كيف ماتريد=ومرضى القلوب من الخبر مستفيده
ودلت تنهشنيَ رخوم الهرابيد=وانا على حفظ العوايد شديده
تاخذ وتعطي تبذل الهرج وتزيد=تقدم لي السكر بكاسه وكيده
اهل النميمة والغثاء والحواسيد=تصنع بلهجتها كلام وتجيده
يارب تقطع عرق حبابة الكيد=اللي على عروض الآوادم مريده
اللي مقاصدهم عن العزة بعيد=تقطع نماهم يامنجيَ عبيده
يالقرم ياالمنعور ذرب الأواليد=اطلب وتلقاني على ماتريده
يابن الرجال الغالبين الصناديد=اللي على العدوان صلفه عنيده
يوم المعارك بالشلف والبواريد=انتم خذيتوها براهي رصيده
بالطيب والفزعات انتم لها سيد=وانتم رجال الغانمات وحفيده
ياشوق اللي لجلك تزف الزغاريد=ياسترها ياعزها ياسنيده
الشعر يطربني بعذب التغاريد=وانا اعشقه واطرب معه بتغريده
فيك اطرز الابيات واقول واعيد=واترك قديم الشعر وانحت جديده
فيك الشعر يختال يابن الاجاويد=ولك الشعر ينذل ياسيد سيده
انا اعتذر وابيات شعري شواهيد=واكرر اعذاري لحذف القصيده