غايب ثلاث شهور ياعالم النور=في غيبتي منهو تقلد وسامي
صريح انا في دنيتي واكره الزور=واستقبل الطيب بكل احترامي
واذا تعذر عند الاجواد معذور=وبعض الامور الرجل فيها يلامي
الشاعر الاول ليا غاب مقبور=يوم اختفا محد بعثله سلامي
ماني منافق اقعد الف وادور=ذا واقعي والصدق خير الكلامي
المرجله له دور والليل مستور=يستر جناحه كل شريف وحرامي
غايب ثلاث شهور والذنب مغفور=وشلون لو غبنا عن الربع عامي
افكار شعري قوم طابور طابور=فزعات ابن حثلين لاصاح يامي
وعلى الغب والله ماني بمقهور=الناس تعرفني وتعرف مقامي
اكتب شعر منضوم واحيان منثور=ساهي ولكن ماردي ماينامي
اللي دخل في صفحتي يبدي الشور=تعبير رايه مايوقف احلامي
صح الله ابدانه وانا منه مشكور=الشعر بحرن لو قطسناه طامي
الشعر نبعن لو طرقناه بيفور=واسع خيالي والفرايد مهامي
ماحب اكون بعالم الشعر مغرور=انا رقم في عالم الشعر سامي
من ديرتي شديت وضحا من الخور=مرباعها سنجار عوجا سنامي
خيالها خيال من جد صطور=لاثارت القوات رجلن همامي
شلفاي رايب دمها تقطع الزور=مضرابها قتال بالحيل دامي
انواع بشعار جارح وزرزور=فيهم عقاب الشعر وفيهم قطامي
صقوط طرواده من اسباب هكتور=تبكي على ذكره رفوف الحمامي
ماغاب ذكره قط لازال مذكور=ولي فعل فعله يشد الحزامي