ليت حرف الشعر ما حرّك شفاتي = دام عمري بالثواني و الدقيقه
مير نبع الشعر ورث ٍ في حياتي = من وانا طفل ٍ قبل ذبح العقيقه
يا إلاهي طالبك حبل النجاتي = آآآه يا سامع ندا صوت الغريقه
وسط غبّه من هواجيس المباتي =تتعب الغطاس لو طب العميقه
تشبه الياقوت من فذّة زكاتي = يوم جفّ الورد واستنزف رحيقه
يا صديق ٍ خابره يحفظ وصاتي = قل لهم لا مات والشاهد رفيقه
فالوصيه شرع بالقول الثباتي = مثل ما وصّى شقيق ٍ في شقيقه
انشر اللي ما نشرته يا غناتي = وابلغ الحيين عن معنى الوثيقه
ربما اوجر عليها في مماتي= والصديق احيان يوجر في صديقه
لا تكاسل دامها اتزيد احسناتي=واكشف الموضوع بأكثر من طريقه
خبّر اللي ما عرف سكر نباتي = يوم اطرّزها على ثوب الحقيقه
وضّح اللي ما تبيّن للرّواتي = يوم زفراتي تعدّت مع شهيقه
قل لهم عن ما بدر وسط النواتي = وانشطار ٍ كل ما شبّت حريقه
إحترِق في داخلي وانقل دواتي = لين حرفي يشهد بعينك بريقه
فالليالي كل ابوهن مقفياتي = والبقا للي خلق كل الخليقه
يعلم اللي قد خفا بالمقبلاتي = والليال الماضيه يعرف فريقه
يا صديق ٍ حافظ ٍ كل الوصاتي= جاك علمي والله الله بالوثيقه