يا تركي الفيصل الأشعار تنقاد=والموقف الحاضر يذكّر بماضيه
يا بن رشيد احداث الأيّام تنعاد=يعيدها اسم المعزب وطاريه
يعيد ذكرى بيت زيزوم الأولاد=بيتٍ لأبن رشيد ماحدٍ بناسيه
ابن رخيص ونازلٍ حد الأجراد=قال اقبلوا وانتم هل البيت ياهيه
بيتٍ علم. ياللي عن البيت نشّاد=من قول عبد الله وانا اليوم اجاريه
ماهو بلجل ياقال شاعر وقصاد=لاشك يوم اطريه لي مقصدٍ فيه
قصدي ابذكر ماحصل بين الأجواد=واللي حصل مابينهم نفتخر فيه
هذاك جاد وذاك له بالوفاء زاد=هذا يبي يأويه وهذا يجازيه
وتبادلو مابينهم فخر الأجداد=والكل منهم حق الأجواد يدّيه
ومفاخر الأجداد تبقى بالأحفاد=بولد الولد او واحدٍ من بنيخيه
واليوم حنا ببيت كسّاب الأمجاد=عودة.ابن رخيص ولنا الشرف فيه
والله.فلاجينا لجل لقمة الزاد=جيناه لجل اسمٍ نعزه ونغليه
وارجع واعيد وطيّب القول ينعاد=قال اقبلوا وانتم هل البيت ياهيه
واخوان ميثا طيبهم ماله عداد= هم مزبن اللي جاير الوقت حاديه
وجبّة سقاه من اول الوسم رعّاد= بيتٍ يابن رشيد ماحدٍ جهل فيه