أشرفت راس معمرداً من شرفها= من ضيقة الخاطر رقيت الطويلات
حداني الهاجس وجسمي نحفها = نحف قلم بنسل تبرّيه مبرات
شاهدت نحت بالحجر ماعرفها= أثار ناس قبلنا ضمن الأموات
جرد السنين الهوج دمت طرفها= شهب الليالي بالسنين القديمات
عواصف تجري وتدمس غرفها= تظهر علامات وتخفي علامات
نرقا الطوال اللي شكينا كلفها= نشغل بها نفس ياما الوقت به فات
جلست لين الشمس قرب هرفها= وحدّرت من روس الطوال المنيفات
ومن الشقاء نفسي تعظّم هدفها= تصفق بي أرياح زعوج نشيطات
والقلب لطراف المحاني رجفها= لكن يردنّه ضلوع نحيفات
دنياء نصارعها كثير صدفها= أيامها وغيب الليالي خفيات
بحداثها تعسف ولا أحد عسفها =مجهول غيبه والزّمن له فجاءات
يازينها ياشينها ياعجفها= فيها مرارات ولها مسرّات
أسرارها ماكل عالم كشفها= وغيب الزّمن ماينشر بالمجلات
يمشيك تيار الزّمن مع جرفها= من ضمن ناس وبالنهاية حسابات
أذيابته ذلّت وخلّت حوفها = وأبا الثعل به شاخ ونظّم عصابات
من جورها خفنا وشفنا خوفها= والوقت يمشي بك على غير مشهات
كم واحداً عقب مراكيضه أفها= وقصرت خطاه اللي من أول بعيدات
دنياء تحد أسيوفها مع شلفها= بسطواتها تذهب جموع قويات
والأرض لو ضاقة بعيدطرفها= ولا عن المنايا لاهزايم ومنجات
وتمر النخل يوخذ ويرمى حجفها= ولا تجامل المخلوق بفعل الرديات
ومن لا حشم نفسه دقونه نتفها= والعيب تاباه النفوس الشريفات
والحر يفرس بالمخالب علفها= وعلى الوطا ماتجمع الذيب والشات
هذي تجاريب الحياة وشغفها= ترجمتها بملخص الوضع صفحات
وما جاز لك شيله وعذّف عذفها= ماكل مايكتب بيوت جزيلات
وكلّفت به قرم سهاله قصفها= الضاحي الجهراء وصل بالسّلامات
فوق أسرد توه تجمع شقفها= شغل الخواجة مرخصاته ريالات
شكل الحصاء يوم التروس تحذفها= حاشات هملول والأرياح صلفات
صنعة خبير والتّكانة حرفها= نال الشهادة بأختراع الصناعات
وطرق المخارج والدّروب تعرفها= وأحسب مخاطر سرعتك والمطبات
تلفي لقرم والمراجل وقفها= ملفاك أبو ثامر وخص الجماعات
مضمون أنا مارسلت داخل ظرفها= يحمل سلام والختام التحيات

يقول من زين المثايل عسفها= يمشن على بالي خفاف مطيعات
بحر المثايل شارباّمن طرفها= يجن معي ولاهن عليّه صعيبات
ياراكب اللي للفيافي قصفها= عبار دو لسهال البعيدات
صنعة خبير جهزه من كلفها= ماحط بالطبلون يادست له هات
أن دار ويله بالصحاري كشفها= يشفي غليك بالدروب العجيبات
يطوي سهوم القاع طوة خصفها= من ضاحي الجهراء لشرقي قيالات
يلفي لقرم والمراجل وقفها= بانة أفعوله بالسنين العصيبات
له مجلس يرتاح به من عرفها = الليث أبو نواف ريف الرديات
تر منزله بعالي نوابي شعفها= يوم أن خطو اللاش مايذبح الشات
عدوهم يشكي مضارب سيفها= يوم انها بعصور خيلاً وغارات
يذكر زمانه ضايمه من صدفها= وناقف معه في الخفاء والبيانات
أن جاك من عوج البشر من جنفها= قلبه حقود ويعطي الرمز بسكات
هلوس الرجالاللي خباث نطفها = تقطع عراقيب القفاء بالفراغات
ابعد ضعونك عن ملايم سلفها= والله خلق لناس فجوج وسيعات
أبعد ضعونك عن ملايم سلفها=والله خلق لناس فجوج وسيعات
دنياك محداً سالم من صلفها= من دورنا ومر السنين القديمات
أن عاضبة دنياك يالقرم خفها= ترمي بعرضك بالخفاء تقل دانات
وبدل بغيره وثم تلقاء خلفها= وسجد لرب عالم بالخفيات
وعسى القساوة تبدله في صخفها= وتبقاء على روس اعلا والمسرات
والخاتمة باللي لشمسه كشفها= الواحد اللي مالنا عنه منجات
وعداد ماتزمي عوالي شعفها = وعداد ماسار القلم بالسجلات
وعداد ماتخضر مسايح ندفها= تهدا لكم منا سلام وتحيات