ياقالة الناس قول الزور ماقوله = مالي بغلطاتهم عوجه ولا أقداها
ماني وكيل البشر دحوشه ولا أهموله= أقصر قدم سبت رجلي وأزن أخطاها
أنا الذي ماشتغل في شيء مانوله = ولا أشغل به النّفس والمنقود يقفاها
أمشي مع اللي مشى مشياً على طوله = والدلبحة يوجع الرجلين ممشاها
لو المشاكل بدون العدل محلوله = مأسسة محكمة للفصل بقضاها
تطلب حقوق ماهي لك ليه وشّوله = دام المقادير ماتقدر مناحاها
كلن على رغبته بتسويق محصوله = من طب الأسواق يعرف سعر مشراها
ويتجر مع اللي تجر لوكان بنعوله = ومن ذاق طعم الحوامض مــــيّز أحلاها
وكلن هدومه يفصلهن على على طوله = ويمد رجله قدر ماتاصل أغطاها
وياقالة النّاس قلت الحق وأقوله = واللي قنع من كلامي قلت حياها
لي منهج مختلف عن باقي أعقوله = وسراير الناس ماتهمن خفاياها
النّاس من طينة وبالخلق معزوله = مثل المحيطات مالحها ومرواها
أحد أجاج وملحه زاد مفعوله = وأحد قراح يرد الري مسقاها
وأحد مراره يذوقه من نزل حوله = وأحد يشاد العسل بالذّوق ماحلاها
وراع النمايم وهرجه ماشتهي قوله = رفقات الأنذال لوزانة توذّاها
والنّاس بالنّاس والأطباع مجهوله = وحاجتك للناس تظهر لك مزاياها
ومن راقب النّاس همّه زادة أحموله = يموت وفقره بنفسه دوم مأغناها
مشيك عزيـز لـو الأقـدام مشلولـه=ولا طيبة اللاش وممشاكم على أرضاها
والرّزق والأجـل والأعمـار مكفولـه=ومايكتـب الله مـن الأقـدار تلقاهـا
واللي غدا بالليال السود وأضلوله = يصبر وشمس الضحى تهديه بضياها
وطريق الأنذال ومساره ومدلوله = ماتوصلك للفضاء لوسرت لقصاها
رافق رجال الــشّرف والعرف وزحوله= عز الفتى من فعايلها بيمناها
ولا تطرق الباب والأبواب مقفوله = ومن سكّر الباب جــنّب لاتنصاها
ولا تكسب المال وأنت النّفس مذلوله = فرعون قبلك غرق والمال خلاها
والحال لابدها للقبر محموله = ومامر اللي قبلنا ملزوم ياطاها