قطفت من شعري نواوير وزهور = وغلفتها تقدير راع الجماله
للشعر عندي قدر واحساس وشعور = والمدح مايركب بليا دلاله
ومن يفعل المعروف يمدح وماجور = الطيب والتقدير كله زهاله
ياماجد بن حمود ماجيت بقصور = اغرقتني بالطيب قبل الجماله
حرٍ ولد حرٍ ومن ماكر صقور = صيداته الجزلات هام وقواله
لو يعتذر ماهو عن الطيب معذور = متعمقٍ مابين عمه وخاله
وجدك عبيد اللي مع الناس مذكور = ياجا مجال الطيب جابوا مجاله
من يوم في بقعاء بساتين وحيور= نماه مايذخر لسوق وبقاله
للضيف واللي مر بالدار معسور = يقلط على خف النفوس بسهاله
ودليل قولي للاجاويد مخبور = جيران جدك خاشروه بحلاله
ياقيل بقعاء قالوا عبيد به نور = يجلا ظلام الليل مابه جهاله
والطيب ماياتي على هرجت الزور = ولا يدركه من هو يشح بحلاله
والمجد قمه دونها شوك وحفور = تبي عزوم رجال تعشق نواله
والا الردي لو هام عاجز ومثبور = تفتر عضوده مايحقق وصاله
فداك ياماجد هل الغدر والجور = اللي يحبون الجهل والنذاله
وعساك تسلم من صواديف ودهور = والله يحفظك يارفيع الاصاله
طيب ومثلك يالمواقيف له دور = دون الخوي تاقف بعزم وبساله
وليانخاك اللي من الوقت مقهور = تشيل حمل اللي تردّت حواله
والختم يبو حمود مشكور مشكور = احرجتني بالطيب قبل الجماله