بديت باللي ماخسر من لجاله=اللي خلق سبع الوطا والسماوات
وارجيه عفوه يوم كلن رجاله=في يوم نجمع به ذليلين وعرات
ومن بعد ذكره يابيوت الجزاله=قومي معي لي بك مقاصد وغايات
في حفلة اهل الطيب واهل الشكاله=اللي لهم فعل(ن) مع الناس مامات
دعوة أبو ريان ولاّ اتصاله=تكفي أجي لوني بحد الولايات
إيه أتشرف بالحفل واعناله=مدام أبو نواف راعيه بالذات
رجل(ن) علوم الطيب هام ورقاله=حتى شهر علمه بكل المهمات
أبي أبارك له بليل احتفاله=واطلب عساهم بالفرح والمسرات
وأقول لعليان بأسعد لياله=مبروك ياعل الفرح كل الاوقات
انتم حزام الطيب وانتم رجاله=من روس شمر بالسنين القديمات
تمشون مع شيخٍ بطيبه بناله=صرح(ن) ثبت كله شموخ وبطولات
سحلي ابن هزاع والطيب فاله=شيخٍ جمع بين الكرم المروات
ومنكم فريد الفعل والطيب ناله=رجلٍ علومه كل ابوها جزيلات
مرشد أبو متعب إليا جاء مجاله=نرفع له البيضا بروس الطويلات
له فعلٍ مثبت وصاحب جماله=مانجهله هذا الصحيح وله اثبات
مثله قليل ونادرات(ن) خصاله=من الجنوب الى حدود القريات
الطيب لو انه يجي بالسهاله=مانعرف العفنين في ماضي(ن) فات
الطيب صعب وحض منهم يناله=بالوقت هذا خص وبكل الاوقات
انـــتـم هــل المـلحـــا ولابــــه بـحـــاله=كسّابـة عـلوم الفـــخر والجـــمالات
طلــتــو سـنام المـجـد وانــتم رجــاله=وافين ما فـيـكم ردي يـالشريـهـات
كبيركم لاجاء لزومه وجاء له=يفك عسرات الأمور الصعيبات
وصغيركم وقت الشدايد لحاله=فعله يشرف يوم دور المغيرات
هذا الصحيح ولو تطول المقاله=عندي على شرح الحقايق مجالات
وخــــتـــامهــا عــــلـى مــحــــمـد وآلـــــه=صـلو علــيــه إليــا أنذكر وســط الأبيـــات