احب شوف البر ومشيٍ مع البر= وضوح القمر وشوف النجوم السواري
وأحب شوف العشب والروض الأخضر= وريح الخزاما والنفل بالصحاري
وأحب شوف النار والنجر يزجر= ودلال بغداد على جال ناري
وأحب شوف الفقع والعشب مخضر= وعشبٍ سبغ لون الخضاب الخضاري
من وابل والمزن يردم ويمطر=هطّال همّال يعم الخباري
برفقة قروم بالسوالف تسامر= بحضورهم يازين وقت السهاري
ربعاً على اللأزم تجي ماتوخر= عندي حلا من شوف سوق الحضاري
وشوف الغنم والبيت والطرش مشتر= بأرض قفر ماعوسته الأثاري
وتبعد عن الأزعاج وثقافة الشر= وحياة ناس بين بايع وشاري
وصجّه ولجّه وأكثر الناس تزبر= ناس مع الجاني وناس تثاري
وصوت الفرامل يوم بالقار تفتر= شباب ليل ونومهم بالنهاري
ناس تفحط وناس معهم تشاجر = أحداث ماتفهم حقوق الجواري
ودي بحيات البر لوكان به حر= ولوكان جوع وبرد ولابه مذاري
نرعى الغنم والأبل ونشرب من الدّر= وننسى الشقاء وننسى الغثاء والطواري
وشوف الجهامة بالصحاصيح تنشر= عقب التعب ومشي السراء والمساري
بأرضٍ قفر والصيد له شوف وجرر= طير الحجل هو والقطا والحباري
دار جنوب من الرّعن وغربي الخر= ومن السادة لشرقي جبال الضواري
ولولا ظروف تحكمن غصب مضطر= لامشي على بر نباته قفاري
نجنب ونشمل ونوب نسند ونحدر= بأول نبات العشب بأرض البراري
مشيك معاها كيف والبال مستر= من غير أوامر ولا المهمة أجباري
بديار ربعاً بالنواميس تذكر= ترعى النبات ويحتمون الدياري
هذا هوى نفسي لو الوقت لي حر= هو مطلبي وهو رغبتي وختياري
والعمر لوطوّل له القبر يحفر= توضع بوسطه جثةٍ وأنت عاري
هذي النهاية وأنت بالعقل فكر= ياللي تحسب الليل دوماً قماري
والخاتمة صلوا عدد من يكبر= على رسولٍ عد ماهب ذاري