ليه القساء وكثر الخطاء والمعاذير= دام القدر مكتوب لك بالصحيفه
وكان الزّمن بك جار مامن جبابير= جبر العرب يؤذي ويمكن تعيفه
الياجاربك ماهي تفيد المحاذير=وقتك خصيمك وأخر الجسم جيفه
حكم القدر ماهي تردّه نواطير= لو كنت في روس الجبال المنيفه
والخلق لو تفزع وصارت طوابير= ماســّرتك والخيل صعب تعسيفه
أن مافزع ورضاك رب المقادير= فزعات خلق الله تضيّح خفيفه
هو الوحيد مدبر الأمر ومدير= وجود ماهو جوده قليل رغيفه
نطمع ونشقاء بالذهب والدنانير= والله يحب أكرام عبده وضيفه
وطبع الزمن قاسي على الناس يامطير= الناس تشقاء في غروره وزيفه
يالله يامجري هبوب المعاصير= أكتب لنا رزقاً بطرقٍ شريفه
وتفكنا من شر نفاخة الكير= اهل النفوس الحاقدات الضّــعيفه
وأكتب لنا من الخير ياقاسم الخير= يارازقاً خلقاً جسومه نحيفه
أنت الذي تفهم خفايا الجماهير= ونية عويضه وغدرها في وليفه
يأمن عليك أظهار دلوه من البير= ياكافلاً رزق النفوس الكفيفه
وكفلت رزق أقصار عوج المناقير= أشركتها مع صارمٍ له وحيفه
ورزقت حشرات الطعوس المحادير= حمر الطعوس اللي تهايل زحيفه
ضعيف حيل عن السفر والمشاوير= خلق كفيف وعايش في قطيفه
نطلبك مانطلب غني الهوامير= يامن رفعت الحايمات برفيفه
اجعل لنا من جود جودك تياسير = نرضاء بجودك وجود غيرك نعيفه
يأمن جعلت اليم معها معابير= جندك عبر وجنود ضدك تخيفه
واهلكت فرعون وجنده بتعزير= وانجيت موسى من البحور المخيفه
أنت الذي تذل وتعز وتجير= وترفع وتاضع ولا بفعله كليفه
تكسر طوابير وتنصر طوابير= يامعيد برد الشبط وحرور صيفه
وإلا البشرمن طبعه الشر والخير= وفعل الغدرينصف لك الجسم سيفه
هذا وأنا مالي على الناس تبرير= ومن لاقنع سود الزمن يستظيفه
وأهديت خبراتي وعرفي على سمير= وأن عافها خلوه يمشي بكيفه