ميلاد حب وبرد وبروق ورعود=واجواء فخمه والاماني قتيله
ميلاده العشر ابد ماله اقيود=وحدي ضويت شموع سهره جميله
وقلبن على شوفت حبايبه موعود=طاح وتالم ما لقا احدن يشيله
ودربن مشيته صار مظلم ومسدود=اضوي فتيله ثم تطفي فتيله
قلب الامل لا زال ينبض وموجود=لكن ياسي صار ما ينقويله
باب انفتح من بعده بقفل مأصود=باب الفرح ماعدت انا له دليله
شفت الالم في مهجتي صار مولود=الله يعين اللي مفارق خليله
ارجيه مثل اللي رجاء شخص ملحود=مالي جدا ياكود بالموت اجيله
يا قلبي اللي من لك اسنين مقرود=بالله شفلك باخر العمر حيله
اما نبي ننسئ ونحيا على مود=ولا حبيبك رده باي وسيله
يالقلب الاعمى اه يقليل الفود=شخصيتك بالحب دايم هزيله
لوك تموت لغيره بحب ماتجود=ليتك على حبه كذا تهتديله
هي اقفت و راحت بلا يوم موعود=ولوهي جتك عن الف ليله وليله
انته رسبت بحبها وعندي اشهود=ياللي غرامك مات ماله حصيله
انا بحط اعهود وشروط وبنود=بيني وبينك والليالي كفيله
اما تحب بزود ممنوع هالزود=يكفيك صرت بحب الاول هبيله
وأن كان حاز بخاطركـ شي محدود=لانته بقيس وهي فماهي بليله
انسى خليلن راح بالدرب مفقود=واطفي شموع الجيه المستحيله
وانطر غرام بنيت الطيب والجود=اللي بها درب الفرح نهتوي له
ميلاد حب وبرد وبروق ورعود=واجواء فخمه والاماني قتيله