يأبن آدم الوقت هو الوقت ماخانك = أحسب حسابك على ناسً يحسبونك
فكر بنفسك وشف عيوب صدقانك = شف من تعداك واللي راغ من دونك
وقت الرخاء والفراغه تكثر أعوانك = وعند المهمات والحاجه يعافونك
لو أنت رجلٍ حبيب وعالي شأنك = حتى القريبين بالعازات ينسونك
لو ماتسكر عن العانيين بيبانك = ياسرعهم ياغدرت بك مايخلونك
ولياكثر بالرصيد حساب ميلانك = ياكثر ناس ٍ توددلك ويغلونك
وياقل مالك يخلف الله بنسيانك = وياحل طاريك ماتسلم يسبونك
يكثر عليك الزعل وتشوف عدوانك = لو ماتعادي لقيت اللي يعادونك
عقب المزاحم على بيتك وديوانك = ياصار مابك مطاميع ٍ يهجرونك
لو تشعم النار وتصوت لخلانك = الناس تنساك مره مايمرونك
وتجلس تقلب همومك بين حيطانك = ياما تعيف الحياه ويكثر جنونك
والناس صارت سباع وبان ضرمانك = ياشيف دمك على جسمك يعضونك
ولكان مالله يعينك ماحدن عانك = ماغير ربك هو اللي كافل شونك
يافاهم أفهم وجود ساس بنيانك = حشو الزلق بالمظاهر لايغرونك
أعمل لدينك وخذ أحساب ديانك = مادمت تقوى قبل ناس يشيلونك
وصل الرحم تفرضه يالمسلم أديانك = سنة نبيك وتباعه يوصونك
وخلك محب حبيب عند جيرانك = لابد من ساعة ترحل ويطرونك
ودرب الرداء يامشيته جاب خذلانك = رجال الشرف عن مجالسهم يحقرونك
وياصرت رجل طريق المجد عنوانك = تصير محبوب خلق الله يحبونك
إنت الحكم وأنت اللي ترجح بميزانك = والناس ماهم وراك ولايصوغونك
إختر طريقك بنفسك وأبن سلطانك = وإحرص على معرفة منهم يعزونك
خل النقيلي لغيرك وأحفظ لسانك = وخطاء المخاليق لاتراعيه بعيونك
ولالك شريك بعقلك هو وأيا إيمانك = والورد والشوك يالبذار بغصونك