الشعر من نبعٍ يصفى شهيده= اغرف من الصافي وما خيض كنّه
محيط ميدانه حدوده بعيده= وجرد السبايا السابقة يقطعنّه
ياهازوا السبّق بعسب الجريده = راع الردية خلفهن يفهقنّه
ياطول الميدان يظهر جديده= يظهر خفيٍ خافيٍ حضرنّه
وتبقى الكديشه وثم يبقى هديده =تجلس ويجلس ويقبل الذل جنّه
الميد يظهر كل أصيلٍ بأيده= تظهر ويظهر والردي يظهرنّه
وتظهر من السبّق جوادٍ وحيده= يوم الردي راكبه خاب ظنّه
ياطول المشوار ركضه تزيده= به زود به زوم ليا ضايقنّه
السابقة تظهر ليا طال ميده = ليا أستشهد الشاهد بعلمٍ يكنّه
تظهر كما يظهر خطات الوليده = بنحور قوم يطلقون الأعنّه
على الخيول اللي تلاوك حديده= حلق العنّه من السطر يفصمنّه
يعرف ردي الخيل ويعرف حميده= الغوج يرخص والهلب يرخصنّه
يظهر فريد وثم تظهر فريده= تحت شجاع للمخاطر يعنّه
بوجيه من هم يجدعون المعيده= دواهي بنحور خيلٍ يبنّه
يا سابقي عساك معهن سعيده = حقي بوجهك والحذر ياخذنّه
ما أنتي كديش ولا بعرقك رديده = من ساس خيلٍ راكبه يلحقنّه
ولا تمّدح بنت الأصيل بفديده = والأصل ماهو نافعٍ يا سبقنّه
ماجمّت هوج الرياح الشديده= به فرّقت جمعٍ رقاء راس قنّه
والزرع يعرف جودته من حصيده = عند الحصاد يبين عيبه وفنّه
ويكفي من الموضوع وكثر أتعديده = خوذ النحاسه صافيه وأرم شنّه
وأنهيت موضوعي بختم القصيده = بأزكى صلاتٍ عد فرضٍ وسنّه