يا وجودي وجد من قيد في قيده= أنحكم بجريمتٍ وميزوا صكّه
عيني اللي نثرت دمعها سيده =ولاطفه عقب التفاريق له حكّه
كن به شوك من الحاذ ومزيده = في جفونه حكّةٍ والرمد لكّه
داخلٍ بالموق به جار تقديده= مرهف ومدببه بالخطاء شكّه
من هوى اللي كنه الريم مع صيده = جافلٍ وفروق الأروام له صكّه
مرتعه بأرضٍ شمالي فراريده = تتبعه فرق الجمايل ليا دكّه
طالعت له صايد من صياييده = شافته بالعين ما شافته شكّه
وجفلت ما لافتت شك ومعيده = صافقه ملح وسو الخطر ضكّه
طارده يشكي بعيدٍ مراديده = من طردهن من التّعب ما أحدٍ فكّه
شاركٍ بالحب والود ما ريده = لو يشيلن فوق الأمتان ما عكّه
القفر ياعيس بانت مواريده = وحصيد حصد المزارع جمّع أبلكه
وين عقال العرب عن مقاريده = لا تخلوا حزمت الود منفكّه
خلوا العطشان يشرب مقاصيده= من غشين ما نقع ماه بالسكّه
لين يشرب من كفوفه وأخذ بايده= صافيٍ ما خوضوها هل الدكّه
يأخذ العطشان ماراد ويريده = وكل مالٍ بالغٍ حكمها زكّه
قبل مخباط يصيبك بتسديده = من ظريفٍ قاطعٍ والسهم ركّه
وانتهى الموضوع والشرح ماعيده = مشفرينه عن فهم فاهمٍ فكّه
وأنت رجل تفعل الطيب وتجيده = من رجالٍ تعطي الحق وتفكه
وختمه بأزكاء صلاتٍ وتسجيده = عد ما طافوا حجيجٍ على مكّه