يقول اللي رقاء راس الرعيله = تهيض خانق العبره براسه
سبايب من سقتني حنضليله = وذقت المر من بعد الوناسه
عميل (ن) بالهوى ينكر عميله = بعد ماسلمت عرش الرياسه
أوصف كيف أوصف من جديله = يحير الفكر وتجيه إنتكاسه
شعر ضافي على متنه تشيله = شبيه الليل يعجبني مقاسه
وثمانه مثل براق المخيله = يذوب القلب في حين إلتماسه
عيونه سود ورموشه ضليله = وصدر وردف يزعل من لباسه
وعنقه عنق ريم (ن) في مقيله = عنود (ن) ذيَّرة سمعت حساسه
وضميره وآهني من يلتجيله = والا ماودي أدخل بالسياسه
وخد وقد وأوصاف (ن) جميله = نضيف القلب عن درب النجاسه
وعوده عود نعناع المسيله = عن المخلوق حطو له حراسه
عنود لانشاش ولاجليله = عفيف (ن) ماوطت درب الدناسه
علَّى مشاهده صعب الوسيله = وقلبي زاد بعد اليوم ياسه
عليها من تواصيف الكحيله = حظيظ اللي تحبه في سلاسه
ثلاث سنين والمده طويله = ولا طوّل عذابي غير ناسه
عليه العين ماياقف هميله = وغربلني زماني بالتعاسه
تشكالي وقلبي يشتكيله = وطبيب الحب كادته الدراسه
عذلت القلب لأجل أترك سبيله = ولكن عامر بالحب ساسه
أنا والله لولاها فشيله = لخطف اللي حرم عيني نعاسه
وأبزبن للذذي يزبن دخيله = ولا شافت عيوني قو باسه
يابو نايف ترى روحي عليله = وتعجبني فعولك والحماسه

حي الجواب وحي من خط نيله = إعداد خلق وعدة حساسه
وإعداد ماتمشي على القاع زيله = وعد النهار وعد مظلم دماسه
يابو طناء شوق الهنوف الجميله = شوق الهنوف اللي زهت في لباسه
قريت معنى خطكم وتحليله = عرفت مضمونه وعرفت ساسه
تشكي هوى غرون رموشه ضليله = اللي عروق القلب زوّد يباسه
ليته تجي بالغصب وإلا مثيله = نبي نجرب روحنا بالفراسه
نبي على حيَّه نشب الفتيله = ياما جروح القلب نبري نحاسه
ياما الخليل يقوم يلعن خليله = يبين طيّبها ويسقط خساسه
وإنته وأنا والكل يشفي غليله = ياثارة الهيجاء وصارت حماسه
وإلكان هي بالمال ندفع جزيله = ندفع لهم مهره ونكمل قياسه
اللي ماهو موجود ناصل كفيله = وعند الولي مد الرشا وإنغماسه
فزعت زميل (ن) يوم ينخى زميله = على شقى بقعاء وكثر التعاسه
راع الهوى دايم دروبه خجيله = يضرب طريق (ن) فيه من كصم ياسه
يركض ولكنه قليل (ن) حصيله = مثل الذي يبي اللحم طبخ فاسه
وأنشدك عن رجل ٍقليل ٍحصيله = مشى على درب القراده وداسه
دايم ورى اللوعات يومي شليله = ليله نهاره ضاري (ن) بالشراسه
مشيت في دربه سنين(ن) طويله = وشربت من بحر المرارة بكاسه

ياراكب اللي ميزته سلف وعكوس = ومضبط ٍ مافيه كنّه وتقطيع
يفز قبل إسليتره يلحقــه دوس = لو زاد فيه السوم مايطري البيع
التانكي مملي والأسبير متروس = والسايق الشاطر يعرف المطاليع
وليا إعترض بالعرض مع عرض طخموس= شال الشجر من قوّة الحفر تشليع
يلفي على اللي حاش طيب ٍ وناموس = ماجمعو ساسه وفصله تجاميع
ممدوح شوق اللي زهت كل ملبوس = الجادل اللي هي غناة المطاميع
تنشدعن اللي حاس كل البشرحوس = أهل القرى وأهل الفلا والمداريع
ياما من أجله راحت نفوس ونفوس = أنشهد إنه ضيّع الناس تضييع
طرد الهوى مابه فوايد وناموس = الخاتمه ماغير دمعه وتوديع
الله من هم ٍ وضيق ٍ وهاجوس = بين الحنايا له محل ومشاريع
هم ٍ يطاولني وهم ٍ يجي قوس = وهم ٍ يجي في كل لحاله وتنويع
مافيه شي إلا مجرب ومدروس = إلا هوى الخفرات صعب المواضيع
ياليت لوللحب قاضي وقاموس = الختم رسمي والشهود التواقيع
كم راح لأجل الحب ريس ومريوس = حتى كبار السن واللي مراضيع
غصب ٍعلى العشاق تخضع له الروس= خص ٍإذا كان المواصل تقاطيع
ويلي على خلى مراقب ومحروس = الصاحب اللي طوّع القلب تطويع
ممدوح لو يشرا هوا البال بفلوس= شاريه لكن ماشقو بالمنافيع
اللي حدى قلبي على شاطر الموس = بنجل العيون اللي سهومه قواطيع
أحساسه أودع داخل القلب محسوس = لقيت في داخل ضميري طواليع
الناس تدله بين حفلات وعروس = وأنا أرتجيه سنين وأشهر وأسابيع
كنّه يهددني بجيش ٍ من الروس = ضيّق علي القاع والحزم والريع
كنِّي بحال مساهرالليل مضروس= يميل في جسمي هبوب الذعاذيع
ممدوح لو يشرا هوا البال بفلوس= شاريه لكن ماشقو بالمنافيع
الحظ الأقشر صار نقص (ن) وعاكوس = يلعنك ياحظي قليل التسانيع
يابن ركاد الشنص لازال متعوس = طرد العذارى طبعه خوش تطبيع
مر(ن) يوردني جهنم وفردوس = وأمرار أذوق أمرار كاس القراطيع
أنشدك عن ربع (ن) على نار وجلوس = وقت اللوازم فعلهم بالأصابيع
يخضع لهم مسلم وكافر وممسوس = لكن لبعض الناس نوب (ن) مطاويع
لاهم من الخزرج ولاهم من الأوس= ولاهم من الحضران وأهل المرابيع
وصلو عدد مابالوطا رمل وطعوس = على شفيع الخلق يوم التشافيع