يسألون عن الحكم والحاكمية = مخبثين مالهم بالخير نية
يسألوني ناويينن ينكبوني = وأدري إني في نطاق الجاذبية
قلت أنا اللي دان في قوله ضميري = هالحكم بين الدول مافيه زيه
كود حاجة أتمنى وأتمنى = لو ملكنا حكمه بين البرية
من سرق تقطع على السرقة يمينه = كود سراق القلوب العاطفية
شفت أنا اللي رمشها غطى وجنها = عينها عين المها مابه مرية
سلهمت خجلا وأنا في سلهمتها = ضاع عقلي بالسحر والجاذبية
لو تشوف اللون الأبيض في ذهوله = حين شافه قال مابالكون زيه
لاتغطت ماتغطيها الغطاوي = لو تصف من الغطاوي فوق ميه
قدها الفتان هو سبة جروحي = زينها ينقد على زين البرية
شلت القلب المعنى من ضلوعي = شلته وأقفت وأنا حالي رزية
واغزارة دمع عيني في فراقه = عنده الرمة سواقي ثانوية
سارقه والحد ماطبق عليها = يالمحاكم اجمعونا في قضية
طالب يدها ولا ناوي تنازل = دون قطع ، قطعها والله خطية
ماسوى هذا سوى سمعا وطاعة = مخلص للدين ثم الوطنية
ياسيادات المباحث اسمحولي = كم بلووس مبتلي للمال مية
قلتها عن تجربة والله سلم = ليتني ماجيت أنا رفحا البهية.