الله من جور الليالي والإحباط = وحظ(ن) ليامني بغيته تحدوى
ياخوي ماهي ضربة عتاب وسياط = ضربة سيوف ودبك خيل(ن) وعدوى
الهم مفرط في حشا خيك إفراط = حتى يجر الصوت بالصوت حدوى
من غافل(ن) للجمر والنار ملقاط = ياما نصحته بس من غير جدوى
أقول له: لك خط وحدود ونقاط = تكفى لاتعدينا ترى الشر عدوى
الحلم راس الصبر للحالم بساط = يهدى من الله للصبورين هدوى
ياصبر قلب قصير ياثاني شباط = بك طلت القمرا وعزف(ن) وشدوى
عليه تفكيري خذا أشواط وأشواط = أحرق بصدري وأثلج الصدر وأدوى
وعليه قلبي عن هوى النفس ماأحتاط = ماشفت مثله بين حضر(ن) وبدوى
تغيرت في داخلي كل الأنماط = قلبي وروحي لأريش العين فدوى
يهديني الأشواق بحروف ونقاط = وإهديه شعر يشرح الصدر هدوى

حيالله الله ((المعجز)) على كل الأنماط = سمعت صوته بالشمال يتحدوى
وأرسلت له مرسال بالقاع ماياط = بلمح البصر أقفى وجان يتهدوى
مرسالنا ماعاقته طلعة الغاط = يمرها كالبرق والرعد لا أدوى
الحب ماينفع ولو منه تحتاط = وغصب عليك الروح ترهنه فدوى
وهجر الغوالي كنه مقادح اشواط = وبسبته كم للمنية وردوا
وانا ليا حبيت حبيت بافراط = لو عشت في باريس لاجله تبدوا
واقرد من مثلي حياته تخباط = قلبه مع الأحباب أهداه هدوى
غديت انا بالحب للزين مزقاط = أسهر ليامن الخلايق رقدوا
روحي وروحه حطهن وسط خلاط = يامحاول التفريق مافيه جدوى
لو جاء ((الربيعة)) منّه يصيبه إحباط = وفي عجزه الطاقم جميعه شهدوا
وجرح الهوى لو حاوله ألف خياط = عجزوا ولو للطب كله جردوا
لاتشتكي همي بلغ ألف أبو واط =وللعشق بالعالم قليل حمدوا