ياصاحبـي دنيـاك هـذا عجيبـه = تغيّـر احداثـه لجيـلٍ بعـد جيـل
واشهر مثل عند العـرب نبتديبـه = وعلى المثل نبني معانـي وتأويـل
(بالخيل عـز للرجـاجيل هيبـة) = شطرٍ يقولونه هل الخيـل والهيـل
وهذا بمـاض الوقـت ماينحكيبـه = ايّام دور السيف والرمـح والخيـل
يـوم ان كـلٍ يعتبيهـا لحريـبـه = يازين فوق الخيل صوت الهلاهيـل
واليوم صارت هيبة الرجـل جيبـه = المـال يصنـع هيبـةٍ للرجاجيـل
ومن زاد ماله صار كـلٍ صحيبـه = يسمع صدى صيته بعـزٍ وتبجيـل
والمـال للرجّـال ماهـو معيـبـه = ورجلٍ بلى مالٍ قليـل المحاصيـل
وقصرة يدك عمـا تريـده غليبـه = مثل الذي يبرك لحملـه ولايشيـل
اغنم شبابـك قبـل حـزة مشيبـه = واحرص على العليا ولو تسهر الليل
وعمرٍ بليّا نعـم ويـش ينبغيبـه = أكثر عمار الناس مثل غثا السيـل
لاصـار ماعلـم المراجـل تجيبـه = (ماكنك الا من حسـاب المعاميـل)
(الطيب سندا والمراجل صعيبـه) = قبلي يقولونه صعول الرجاجيل
ولاتامـن الدنيـا بعلمـه وغيبـه = احسب حساب ايّامه اللـي مقابيـل
تضحك بناب وناب يحمل مصيبـه = فيهـا مسـرّاتٍ وفيهـا غرابـيـل
واحذرك بعض النـاس لاتقتديبـه = اللي مناهجهم على القـال والقيـل
وابعِد عن اللي يلحقك منـه ريبـه = ابعَد من الجدي الشمالي عن سهيل
وان شفت بالمجلس نميمه وغيبـه = احفض لسانك عن كثيـر الأقاويـل
(ورفيقك الداني ليـا شفـت) عيبـه = كبر الجبل . خلك مثل مظلم الليـل
وفي محنتـه خلـك دواه وطبيبـه = ما بالرفاقة يافتـى الجـود تبديـل
وصلواعلى اللـي سنتـه نهتديبـه = اللي هُزم في مولده صاحب الفيـل